برێت مەکگۆرک بۆ قوباد تاڵەبانی: جیهان قەرزداری پێشمەرگەیە

ئەرشیف

دیدارێکی پێشووی قوباد تاڵەبانی و برێت مەکگۆرک

برێت مەکگۆرک پۆستێکی قوباد تاڵەبانی جێگری سەرۆکوەزیرانی هەرێم لە پلاتفۆڕمی ئێکس  هاوبەشیکردن (شێر) دەکاتەوە و رایدەگەیەنێت: جیهان قەرزداری پێشمەرگەیە و ماوەیەکی زۆرە چاوەڕوان بووین.

برێت مەکگۆرک، ڕێکخەری کاروباری ڕۆژهەڵاتی ناوەڕاست و باکووری ئەفریقا لە ئەنجوومەنی ئاسایشی ئەمریکا، لەگەڵ شێرکردنەوەی پۆستەکەی قوباد تاڵەبانی ڕایگەیاندووە: "ئەمە هەواڵێکی خۆشە و ماوەیەکی زۆرە چاوەڕوان بووین، پیرۆزبایی لە هەموو ئەو کەسانە دەکەم کە بەشداربوون لەم پرۆسەیەدا، جیهان قەرزاری پێشمەرگەیە".
 برێت مەکگۆرک پێشتر وەک نێردەی تایبەتی سەرۆکی ئەمریکا بۆ هاوپەیمانیی نێودەوڵەتیی دژی داعش دەستبەکاربووە و لەو چوارچێوەیەدا لە شەڕی دژ بە تیرۆریستان ڕۆڵێکی کارای لە ناوچەکەدا گێڕاوە.

برێت مەکگۆرک لە چەندین لێدوان و بڵاوکراوەی پێشوویدا بەردەوام ستایشی ڕۆڵی پێشمەرگەی کردووە و تیشکی خستووەتە سەر ڕۆڵی مێژوویی ئەو هێزە لە پاراستنی ئاسایشی جیهاندا، هەروەها دووپاتیکردووەتەوە کە پێشمەرگەی کوردستان هاوکاری جیهانیان کردووە بۆ تێکشکاندنی تیرۆریستانی داعش.

ئەمەش لەکاتێکدایە، رۆژی 21ی9ی2026، هێزەكانی 70 و 80ی پێشمەرگە لەژێر چەتری وەزارەتی پێشمەرگەدا یەکخران و قوباد تاڵەبانی جێگری سەرۆکوەزیرانیش دووپاتی کردەوە، ئەمە هەنگاوێكی مێژووییە و جەختیشی کردەوە، کە لە پشتیوانییەكانیان بۆ دوورخستنەوەی هێزەكان لە دەستوەردانی سیاسی و حزبی بەردەوام دەبن.

PUKMEDIA