سەرۆککۆمار: تەئکید لە زامنکردنی مافی جوتیارانی کەرکوک دەکاتەوە

تایبەت

سەرۆککۆماری عیراق پێشوازیکرد لە وەفدێکی نوێنەری جووتیارانی پارێزگای کەرکوک

ئەمڕۆ سێشەممە 22ی ئەیلول 2026، نزار ئامێدی سەرۆککۆماری عیراق لەبەغداد- کۆشکی سەلام، پێشوازیکرد لە وەفدێکی نوێنەری جووتیارانی پارێزگای کەرکوک.

لەمیانی دیدارەکەدا کە د.خالید شوانی وەزیری داد و چەند ئەندامێکی پەرلەمان ئامادەیبوون، کۆمەڵێک پرسی پەیوەست بەکەرتی کشتوکاڵ و بارودۆخی جووتیارانی پارێزگای کەرکوک و چۆنیەتی چارەسەرکردنی ئەو ئاستەنگانەی روبەڕوویان دەبنەوە باسکران، ئەمە جگە لەگرنگی دابینکردنی کەرەستەی بەرهەمە کشتوکاڵییەکان و پاڵپشتیکردنی هەوڵەکان بۆ پەرەپێدانی ئەم کەرتە.

سەرۆککۆمار جەختی لە گرنگیدان بە جووتیاران و دابینکردنی پێداویستیەکانیان بە شێوەیەک کردەوە، کە هاوکاربێت لە بوژاندنەوەی چالاکیی کشتوکاڵی و بەهێزکردنی بەرهەمی ناوخۆیی و هاوکات ئاماژەی بەپێویستی چارەسەرکردنی ئەو کێشانەی کە رووبەڕوویان دەبنەوە لەچوارچێوە یاساییەکاندا بەشێوەیەک کەدەستەبەری مافەکانیان و خزمەت بە بەرژەوەندییە گشتییەکان بکات.

لای خۆیانەوە ئەندامانی وەفدەکە کۆمەڵێک داواکاری و پێشنیاری پەیوەست بەدۆخی کشتوکاڵی پارێزگاکەیان خستەڕوو، هاوکات پێزانینی خۆیان بۆ گرنگیدانی سەرۆک کۆمار بەپرس و پێداویستییەکانی جووتیاران دەربڕی.

PUKMEDIA