دادگایەکی عیراق گەندەڵکارێکی بە توندی سزادا

میدیاکان

مەحموود عەبدوڵڵا فەرحان، بەڕێوەبەرى بەشى کاروبارى دارایی لە کۆمپانیاى دابەشکردنى کارەباى ناوەڕاست

دادگاى ناوەندیی بەرەنگاربوونەوەى تاوانەکانى گەندەڵى، سزاى سێ ساڵ زیندانى توند و پێبژاردنی بەسەر مەحموود عەبدوڵڵا فەرحان، بەڕێوەبەرى بەشى کاروبارى دارایی لە کۆمپانیاى دابەشکردنى کارەباى ناوەڕاست سەپاند، کە مانگى حوزەیرانى ڕابردوو لەسەر دۆسیەى گەندەڵى و ساختەکاریى دارایی گەورە دەستگیر کرا.

دادگا جگە لە سزاى زیندانى توند، پێبژاردنى بە بڕى ملیارێک و 170 ملیۆن و 450 هەزار دینار و 203 هەزار دۆلاری بەسەردا سەپاند، کە بەهاى ئەو سامانەیە بە ناڕاوە بەدەستیهێناوەئەمە جگە لەوەی بڕیاریدا بە دەستبەسەرداگرتنى پشکى تۆمارکراو بە ناوى هاوسەرى تۆمەتبار لە باڵەخانە و شوقەیەک کە دەکەونە ناوچەکانى داودى و کەڕادە مریەم لە بەغداد، کە نرخەکەشیان بە یەک ملیار و 100 ملیۆن دینار مەزەندە دەکرێت.

هاوکات، دادگا بڕیاریدا بە دەستبەسەرداگرتنى دوو ئۆتۆمبێلى جۆرى ڕانجڕۆڤەر و تویۆتا لاندکروز، کە نرخەکەیان دەگاتە 203 هەزار دۆلار.

دادگاى ناوەندیی بەرەنگاربوونەوەى تاوانەکانى گەندەڵى، بڕیاریشداوە، سزادراو دواى تەواوبوونى ماوەى سزاکەشى ئازادنەکرێت، تاوەکو بڕى ئەو پێبژاردنە داراییە دەگەڕێنێتەوە کە بەسەریدا سەپێنراوە، ماڵ و موڵکە گواستراوە و نەگواستراوەکانیش دەستیان بەسەرداگیرا، مافیش درا بە دەستەى دەستپاکى داواى قەرەبوو بکات، دواى ئەوەى بڕیارى دادگا دەگاتە پلەى کۆتایی.

PUKMEDIA