سەرۆکوەزیرانی عیراق: بۆ دابینکردنی مووچە سێ بژاردەمان لەبەردەستدا بوو

نوسینگەی رۆژنامەوانی سەرۆکوەزیرانی عیراق

عەلی زەیدی سەرۆک وەزیرانی عیراق

سەرۆک وەزیرانی عیراق لە بەردەم ئەنجوومەنی نوێنەران ئاشکرای کرد، لە مامەڵەکردن لەگەڵ پرسی مووچە و دۆخی داراییدا سێ بژاردەمان لەبەردەمدا بووە، کە پاشەکەوتی مووچە و قەرز و دواکەوتنی مووچە بوون.

بەپێی ڕاگەیەندراوێکی نووسینگەی ڕاگەیاندنی سەرۆکوەزیرانی عیراق، زەیدی لە بەردەم ئەنجومەنی نوێنەران-داڕایگەیاندووە، سێ بژاردەمان لەبەردەست بووە، کە بژاردەی یەکەم بریتی بوو لە پەنابردن بۆ پاشەکەوتی زۆرەملێی مووچە و هێشتنەوەی فەرمانبەر لە چاوەڕوانی بەڵێندا، بژاردەی دووەم دابەشکردنی مووچە بوو لە هەر 45 ڕۆژ جارێکدا.

هەر بەپێی ڕاگەیەندراوەکە، بژاردەی سێیەم بریتی بووە لە قەرزکردن، کە ئەوەش دەبووە هۆی نوقمکردنی وڵات لە قەرزدا، بەتایبەت کە لە ئێستادا وڵات خۆی بەدەست بارگرانیی قەرزە کەڵەکەبووەکانەوە دەناڵێنێت.

ئەمەش لەکاتێکدایە، ئەنجومەنی نوێنەران بڕیاریدا وەزیری دارایی و پارێزگاری بانکی ناوەندی میوانداری بکات بۆ تاوتوێکردنی بڕیاری حکومەتی عیراق سەبارەت بە هەموارکردنەوەی نرخی دۆلار.

PUKMEDIA