بەرهەمهێنانی نەوتی رۆژانەی كەركوك بۆ 450 هەزار بەرمیل بەرزدەکرێتەوە

PUKMEDIA

کێڵگەیەکی نەوت

لە چوارچێوەی ستراتیژی حكومەت و وەزارەت عیراق ئاستی بەرهەمهێنانی نەوتی كەركوك بۆ 450 هەزار بەرمیل لە رۆژێكدا بەرزدەكاتەوە.

باسم محەممەد خزیرە وەزیری نەوتی عیراق رایگەیاند: وەزارەتەكەیان پلانی هەیە بەرهەمی نەوت لە چوار كێڵگەی نەوتی كەركوك بۆ 450 هەزار بەرمیل لە ڕۆژێكدا بەرز بكاتەوە.

بەپێی ڕاگەیەندراوێكی وەزارەتی نەوت، لە چوارچێوەی ستراتیژی حكومەت و وەزارەت بۆ پەرەپێدانی پیشەسازیی نەوت و غاز، بەڕێوەبردنی كارەكانی چوار كێڵگەی كەركوك، واتە كەركوك، بای حەسەن، خەباز و جەمبوور، لە كۆمپانیای نەوتی باكوور و كۆمپانیای غازی باكوورەوە گوازرایەوە بۆ دەستەی بەڕێوەبردنی هاوبەشی ئەو كێڵگانە.

وەزیری نەوت رایگەیاندووە ، كۆمپانیای بی پی هاوبەشێكی ستراتیژییە لە بواری وەبەرهێنان لە نەوت و غازدا، و كاركردن بە گیانی یەك تیمی لەگەڵ ئەم كۆمپانیایە یارمەتیدەر دەبێت بۆ چارەسەركردنی ئاڵنگاری و كۆسپەكانی بەردەم پڕۆژەكە.

بەپێی ڕاگەیەندراوەكە، پڕۆژەكە لەگەڵ كۆمپانیا بەریتانییەكە تەنیا لە بەرهەمهێنان و وەبەرهێنانی نەوت و غازدا كورت نابێتەوە، بەڵكو لە قۆناغی داهاتوودا راهێنانی كادرەكانی وەزارەت، گواستنەوەی شارەزایی و تەكنەلۆژیا، هەروەك درووستكردنی ژێرخانی خزمەتگوزاری بۆ دانیشتووانی ناوخۆیی دەگرێتەوە.

PUKMEDIA