ناوی سلێمانی دەچێتە کتێبی گینسەوە

میدیاکان

لۆگۆی ناوی سلێمانی

لۆگۆی سلێمانی دەچێتە کتێبی گینسەوە و گۆڤە ئەحمەد خاوەنی بیرۆکەی لۆگۆکەش ئاشکرای دەکات، بەم زووانە سەرپەرشتیارانی کتێبەکە دێنە شوێنەکە و ناوی سلێمانی بە رەسمی تۆمار دەکەن.

گۆڤە ئەحمەد خاوەنی بیرۆکەی لۆگۆی سلێمانی، لە لێدوانێکیدا بە PUKMEDIA ی راگەیاند: لە ساڵانی 2024، 2025 و 2026، ئێمە لە ئەنجوومەنی باڵای سلێمانی نوسینی SLEMANI ، دەستمان کرد بە نۆژەنکردنەوەی پرۆژەکە و تۆمار کردنی لە کتێبی گینس، کە ماوەی زیاتر لە سێ ساڵە دەگەڕێمەوە کوردستان و بەردەوام لە هەوڵدام بۆ جێبەجێکردن و نۆژەنکردنەوەی لۆگۆی سلێمانی؛ بیرۆکەیەک کە بە شانازییەوە کاری بۆ دەکەم، بە ئامانجی ئەوەی بتوانێت بە شێوەیەکی شیاو و جوان، ناوی سلێمانی و کوردستان زیاتر بناسێنێت و لە داهاتوودا ببێتە خزمەتێکی نێودەوڵەتی و هەنگاوێک بۆ تۆمارکردنی لە کتێبی گینس.

لە بارەی ئەنجامی هەوڵەکانیشیان، گۆڤە ئەحمەد رایگەیاند: لێرەوە مژدەی ئەوەتا پێدەدەم، کە ئێمە ناوی سلێمانیمان لە کتێبی گینس تۆمار کردووەو بەم زووانە سەرپەرشتیارانی کتێبەکە دێنە شوێنەکە و ناوی سلێمانی بە رەسمی تۆمار دەکرێت.

وتیشی: ئێمە بەم زوووانە دەست بە کارەکانی پرۆژەکە دەکەین، لێرەشەوە بانگەواز دەکەین بۆ سەرمایەداران، بازرگانان، دامەزراوەکان و هەموو دڵسۆزانی شار کە پشتیوانمان بن و هاوکارمان بن، چونکە ئەم کارە دەتوانێت ببێتە بەشێک لە سیمای نوێی سلێمانی و خزمەتێک بۆ شار و کوردستان، لە هەمان کاتدا، بە ڕووناککردنەوەی نووسینەکە لە شەواندا، دەتوانێت سیمایەکی جوان و جیاواز بە شاری سلێمانی ببەخشێت و ببێتە شاباشێکی جوان بۆ شار.

ئاماژەی بەوەشکرد:هیچ کەسێک مافی ئەوەی نییە بەبێ ڕەزامەندی و مۆڵەتی ئێمە، لێدوان یان ڕاگەیاندنێک لەسەر ئەم پرۆژەیە بدات، یان پرۆژەکە بە ناوی خۆیەوە پێشکەش و ناساندن بکات.

لە کۆتایشدا، گۆڤە ئەحمەد، خاوەنی بیرۆکەی نوسینی سلێمانی، هیوای خواست، کە بە هاوکاری و پشتیوانی هەموو دڵسۆزان و خەڵکی سلێمانی، ئەم بیرۆکەیە بگۆڕین بۆ کارێکی مێژوویی و جێگیر.

 ئەمەش لەکاتێکدایە، لۆگۆی ناوی سلێمانی کە لە چیای گۆیژە نوسراوە، لە ساڵی 2003وە پێشنیار کراوە و لە 2013دا لیژنەیەکی بۆ پێکهێنرا و لە ساڵی 2015دا خرایە بواری جێبەجێکردنەوە، کە پانییەکەی 350 مەترە و بەرزییەکەشی 50 مەترە، هاوکات، رووبەری پرۆژەکە شەش هەزار و 600 مەتر دووجایە و 10 دۆنم زەوی بۆ تەرخانکراوە، پڕۆژەکەش 170 ملیۆن دیناری عیراقی تێچووە.

PUKMEDIA