قوباد تاڵەبانی: پشتگیریی بیرمەندان و توێژەرانی بواری فەلسەفە ئەركمانە

نوسینگەی راگەیاندنی قوباد تاڵەبانی

سەردانی قوباد تاڵەبانی بۆلای د. عیرفان مستەفا

قوباد تاڵەبانی، سەردانی نوسەرو لێكۆڵەری فەلسەفی و مامۆستای زانكۆ د. عیرفان مستەفای كرد و جەختی لەوە كردەوە كە فەلسەفە و رۆشنبیری نەخشەڕێگەی گەشەسەندنی گەلانن، هاوكاری و پشتیوانیكردنی بیرمەند و توێژەرانیشی وەك ئەركێك بۆ رووناككردنەوەی رێگەی داهاتووی كۆمەڵگە وەسف كرد.

لە میانی سەردانێكیدا بۆ خورماڵ، قوباد تاڵەبانی جێگری سەرۆكی حكومەت، سەردانی نووسەر و لێكۆڵەری فەلسەفی و مامۆستای زانكۆ، دكتۆر عیرفان مستەفای كرد و رایگەیاند: شارستانێتییەكان و وەرچەرخانە گەورە كۆمەڵایەتییەكان بە پرسیارە فەلسەفییەكان و گۆڕانكارییە فكری و رۆشنبیرییەكان دەستیان پێ كردووە. فەلسەفە و رۆشنبیری نەخشەڕێگەی گەشەسەندن و بەرەوپێشچوونی گەلانن.

ئاماژەی بەوەشكرد: خۆشحاڵین ئەمڕۆ لە كوردستان كەسانێك هەن لە چەشنی دكتۆر عیرفان مستەفا ئەم بوارەیان فەرامۆش نەكردووە و خۆبەخشانە و بە پەرۆشەوە هەوڵی پەرەپێدانی بیری فەلسەفی لەناو گەنجانی وڵاتەكەماندا دەدەن. لە خورماڵ سەردانی بەڕێزیانم كرد و سەرسام بووم بە روئیا و پڕۆژە فكرییەكانی.

ئەوەشی خستەڕوو: ئەركی ئێمەیە پشتگیریی بیرمەندان و رۆشنبیران و توێژەرانی بواری بیر و فەلسەفە بكەین، چونكە ئەوان روونكەرەوەی رێی داهاتووی گەلەكەمانن.

PUKMEDIA