سەرۆککۆمار سەرپەرشتی گەڕاندنەوەی ڕوفاتی 156 ئەنفالکراوی کورد دەکات

سەرۆکایەتی کۆمار

رێورەسمی بەڕێکردنی ڕوفاتی 156 ئەنفالکراوی کورد

بەسەرپەرشتی نزار ئامێدی سەرۆککۆماری عیراق و بە ئامادەبوونی نوێنەریان د.عەلی شوکری سەرۆکی دەستەی ڕاوێژکاران و پسپۆڕان لە سەرۆکایەتی کۆمار، ڕێوڕەسمی گەڕاندنەوەی ڕوفاتی 156 شەهیدی ئەنفالکراوی کورد و قوربانییانی گۆڕە بەکۆمەڵەکان بۆ هەرێمی کوردستان، کە ئەمڕۆ شەممە، 26ی ئەیلوول 2026، لەباڵەخانەی وەزارەتی تەندروستی، وەک ئامادەکارییەک بۆ گەڕاندنەوە و ناشتنیان بەڕێوەچوو.

بەپێی راگەیەندراوێکی نوسینگەی سەرۆکایەتی کۆمار، لەڕێوڕەسمەکەدا ژمارەیەک بەرپرس و ڕاوێژکاری سەرۆکایەتی کۆمار و نوێنەرانی وەزارەتی تەندروستی و دەزگای شەهیدان و دەزگای شەهیدان و ئەنفال لەهەرێمی کوردستان ئامادەی بوون، سەرەتای ڕێوڕەسمەکە بە خوێندنەوەی سورەتی فاتیحە بۆ گیانی پاکیان و نمایشێکی پاسەوانی شەرەف دەستیپێکرد، دواتر تاجە گوڵینە لەسەر تەرمی شەهیدان دانرا.

ئەم تەرمانەی کە ئەمڕۆ ڕادەست کرانەوە، ڕوفاتی سێیەمین کۆمەڵەی قوربانیانی ئەنفالکراوانی کوردن، کە لەماوەی ساڵانی 2024 و 2025 لەگۆڕە بەکۆمەڵەکانی تل شێخیەیی قەزای سەلمان لەپارێزگای موسەنا گۆڕەکانیان هەڵدنرابوونەوە، ئەمەش لەچوارچێوەی گەڕان بەدوای ڕوفاتی قوربانیانی گۆڕە بەکۆمەڵەکان و ناسینەوەیان وەک ئامادەکارییەک بۆ گەڕاندنەوەیان بۆ هەرێمی کوردستان و ئەنجامدانی ڕێوڕەسمی ناشتن لە گۆڕستانە تایبەتەکاندا کە لەگەڵ شکۆی شەهیداندا بگونجێت، وەک بەرجەستەکردنی وەفایەک بۆ قوربانیدانیان لە بەرامبەر ئەو تاوانانەی کەڕژێمی پێشوو ئەنجامیداوون.

PUKMEDIA