پەرلەمانتارێکی یەکێتی هەوڵی جێگیرکردنی چەند داواکارییەکی خەڵک لەبودجەدا دەدات

PUKMEDIA

د. بڕیار ڕەشید ئەندامی فراکسیۆنی یەکێتی لە ئەنجومەنی نوێنەرانی عیراق

ئەندامێکی فراکسیۆنی یەکێتی لە ئەنجومەنی نوێنەرانی عیراق، بە پاڵپشتیی 88 پەرلەمانتار نووسراوێکی رەسمیی بۆ داواکارییەکانی دامەزراندنی سێ یەکەمەکان و گرێبەستەکان و خۆبەخشان ڕادەستی سەرۆکایەتیی پەرلەمان کرد.

د. بڕیار ڕەشید ئەندامی فراکسیۆنی یەکێتی لە ئەنجومەنی نوێنەرانی عیراق بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند: بە ئیمزای 88 پەرلەمانتار پێنج داواکاریی رەسمیی ئاراستەی سەرۆکی ئەنجومەنی نوێنەران کرد تا لە یاسای بودجەی2027دا جێگیر بکرێن.

راشیگەیاند: داواکاریی یەکەم تەرخانکردنی پلەی وەزیفی و دامەزراندنە بۆ سێ یەکەمەکانی بەشەکانی زانکۆ و پەیمانگاکانی هەرێم بۆ ساڵانی (2017 - 2025)، هەروەها دامەزراندنی 13هەزار و 300 خۆبەخشی کەرتی تەندروستی لەسەر میلاکی هەمیشەیی یەکێکی دیکەیە لە داواکارییە سەرەکییەکان.

د. بڕیار ڕەشید ئاماژەی بەوەشکرد، داواکارییەکی دیکە جێگیرکردنی زیاتر لە 30 هەزار فەرمانبەری گرێبەستی هەرێمە، کە لە ئێستادا مووچەکانیان لەلایەن حکومەتی فیدراڵییەوە دابین دەکرێت، هاوکات خەرجکردنی تەواوی شایستە داراییەکانی ئەو مامۆستا و فەرمانبەرانەی لەدایکبووی ساڵانی (1962، 1963 و 1964)ن و خانەنشین کراون، لەگەڵ ڕەخساندنی دەرفەتی دامەزراندن بۆ دەرچووانی ساڵانی پێشووی زانکۆ و پەیمانگاکان.

PUKMEDIA