زیاتر لە 16 هەزار خانەنشین دوای مردنیان موچەكانیان رانەگیراوە

راگەیاندنی دەستەی دەستپاكی عیراق

بینای دەستەی دەستپاكی عیراق

دەستەی دەستپاكی عیراق رایدەگەیەنێت: لە چوارچێوەی وردبنییەكانیاندا دەركەوتووتەوە زیاتر لە 16 هەزار خانەنشین لە دوای مردنیان مووچەكانیان رانەگیراوە و 40 هەزار کارتی بانکیی بە پەنجەمۆری کۆن دەرچووە.

لە راگەیەندراوێكدا دەستەی دەستپاكی عیراق  رایگەیاند: لەسەر رێنمایی عەلی زەیدی سەرۆك وەزیرانی عیراق و بە ئامانجی رێگریكردن لە گەندەڵی و بەهەدەردانی موڵك و ماڵی گشتی، بەدواداچوون و وردبینیان بۆ دەستەی گشتی خانەنشینی دەستپێكردووە.

ئەوەشی خستووەتەڕوو، لە چوارچێوەی وردبنییەكانیان دەركەوتووە، 16 هەزار و 384 خانەنشین دوای مردنیان موچەكانیان رانەگیراوە، بەڕێوەبەری ژمارەیەك فەرمانگەی خانەنشینیش لە پارێزگاكان ناوی ساختە و وەهمیان بۆ لیستی خانەنشینان زیادكردووە، هاوکات 40 هەزار کارتی بانکیی بە پەنجەمۆری کۆن دەرچووە

دەستەی دەستپاكی ئاماژەی بەوەشدا، هەر لە چوارچێوەی وردبینییەكان موچەی 19 هەزار و 321 خانەنشین لە پارێزگای ئەنبار راگیراوە، وردبینیش بۆ زیاتر لە 102 هەزار تۆماری خانەنشینی لە پارێزگای نەینەوا دەستیپێكردووە و لەئێستاشدا چەند لیژنەیەكی تایبەتمەند كار لەسەر بەدیجیتاڵكردنی تۆماری خانەنشنینان دەكەن بۆ رێگریكردن لە مووچەی وەهمی و پاراستنی موڵك و ماڵی گشتی.

PUKMEDIA