سەرۆكی پەرلەمانی ئێران گەیشتە بەغداد

واع

سەرۆكی پەرلەمانی ئێران لە فڕۆکەخانەی بەغداد

سەرۆكی پەرلەمانی ئێران بەسەردانێكی رەسمی گەشتە عیراق و دووپاتیشی کردەوە تاران و بەغداد جەخت لە پەیوەندییە مێژووییەكان و چارەنووسی هاوبەشی نێوانیان دەكەنەوە.

بەپێی راگەیەندراوێکی نوسینگەی راگەیاندنی ئەنجومەنی نوێنەرانی عیراق، محەمەد باقر قالیباف، سەرۆكی پەرلەمانی ئێران، بە سەردانێکی رەسمی گەیشتە بەغدادی پایتەخت و لەلایەن عەدنان فەیحان جێگری یەکەمی سەرۆکی ئەنجومەنی نوێنەرانەوە پێشوازی لێکرا.

هاوکات، سەرۆكی پەرلەمانی ئێران لە كاتی بەرێككەوتنی بۆ عیراق لە پۆستێكیدا لە ئێكس نووسویەتی،  پەیوەندییەكانی نێوان هەردوو گەلی عیراق و ئێران وەك پەیوەندییەكی مێژوویی و پچڕاننەبوو پێناسە دەكرێت، كە لەسەر بنەمای هاوسێیەتی، برایەتی و رووبەڕووبوونەوەی ئاڵینگاریە بەردەوامەكان بونیاد نراوە.

محەمەد باقر قالیباف ئاماژەی بەوەشكردوە، هەردوولا هاوبەشن لە رەتكردنەوە و بەرەنگاربوونەوەی دەستتێوەردانە بیانییەكان لە ناوچەكەدا، وتیشی باوەڕبوونی تەواو بە چارەنووسی هاوبەشی هەردوو وڵات و هاندەری سەرەكیی بەرەپێشچوونی ئەو پەیوەندییانەیە.


 بڕیارە قالیباف ماوەی سێ‌ رۆژ لە عێراق بمێنێتەوە، لەم سەردانەدا لەگەڵ ژمارەیەك لە لێپرسراوانی عیراقی و كەسایەتییە سیاسییەكان كۆببێتەوە، بۆ تاوتوێكردنی كۆمەڵێك دۆسیەی هاوبەشی نێوان بەغداد و تاران.

PUKMEDIA