10 ملیۆن دۆلار بۆ گەڕانەوەی ئاوارەکان تەرخان دەکرێت

میدیاکان

کەمپێکی ئاوارەکان

وەزارەتی کۆچ و کۆچبەرانی عیراق بە هەماهەنگی لەگەڵ ئاژانسێکی کۆری بۆ هەماهەنگی نێودەوڵەتی و بەرنامەی پەرەپێدانی نەتەوە یەکگرتووەکان، دەستپێشخەرییەکی نوێیان بە بڕی 10 ملیۆن دۆلار بۆ دابینکردنی چارەسەری سەقامگیریی ئاوارەبووانی ناوخۆ  ئیمزا کرد.

تیتۆن میترا، نوێنەری بەرنامەی پەرەپێدانی نەتەوەیەکگرتووەکان ئاماژەی بەوە کردووە کە دەستپێشخەرییەکە بەشدار دەبێت لە باشترکردنی ژێرخانی کۆمەڵایەتی و باشترکردنی شوێنەکانی نیشتەجێبوون و گونجاندنیان لەگەڵ گۆڕانکارییەکانی کەشوهەوا، لەگەڵ پتەوکردنی توانا ناوخۆییەکان لە بونیادنانی ئاشتی و دوورکەوتنەوە لە گرژییەکان.

ئەم دەستپێشخەرییە نوێیە لە چوارچێوەی هەماهەنگی و هاوکاریی نێوان وەزارەتی کۆچ و کۆچبەرانی عیراق، ئاژانسی کۆری بۆ هەماهەنگی نێودەوڵەتی و بەرنامەی پەرەپێدانی نەتەوە یەکگرتووەکان جێبەجێ دەکرێت. پڕۆژەکە بە بڕی 10 ملیۆن دۆلار بۆ ماوەی پێنج ساڵ بەردەوام دەبێت و ئامانجی سەرەکیی پشتیوانیکردنی زیاتر لە 18 هەزار کەسە لە ئاوارەبووان و گەڕاوەکانی پارێزگاکانی ئەنبار، سەڵاحەدین، نەینەوا و کەرکووک، هاوکات کار بۆ باشترکردنی ژێرخانی کۆمەڵایەتی، شوێنی نیشتەجێبوون و بەهێزکردنی توانا ناوخۆییەکان دەکات.

PUKMEDIA