بۆ یه‌كه‌مجار داهاتی ده‌روازه‌ سنوورییه‌كان نیو تریلیۆن دیناری تێپه‌ڕ‌اند

سەباح

دەروازەی تەریبیلی سنووری

ده‌سته‌ی ده‌روازه‌ سنوورییه‌كانی عیراق ئاشكرایكرد داهاتی دارایی ده‌روازه‌كان له‌ مانگی ته‌ممووزی رابردوودا ژماره‌یه‌كی پێوانه‌یی تۆمار كردووه‌ و 500 ملیار دیناری تێپه‌ڕ‌اندووه‌، هاوكات رێكاره‌كانی چاودێری و به‌ره‌نگاربوونه‌وه‌ی گه‌نده‌ڵی و قاچاخچێتی توندتر ده‌كرێنه‌وه‌.

عومه‌ر عه‌دنان وائیلی، سه‌رۆكی ده‌سته‌ی ده‌روازه‌ سنوورییه‌كانی عیراق رایگه‌یاند: سه‌ردانی سه‌رۆكوه‌زیران بۆ باره‌گای ده‌سته‌كه‌، پشتیوانییه‌كی گه‌وره‌یه‌ بۆ هه‌وڵه‌كانی رووبه‌ڕ‌ووبوونه‌وه‌ی گه‌نده‌ڵی و به‌رزكردنه‌وه‌ی ئاستی چاودێری.
ئاماژه‌ی به‌وه‌شكرد: رێكاره‌ نوێیه‌كان و به‌ستنه‌وه‌ی سیسته‌می ئه‌لیكترۆنی و چاودێریی ڕاسته‌وخۆی فڕ‌ۆكه‌خانه‌ و به‌نده‌ره‌كان، ڕۆڵی سه‌ره‌كییان هه‌بووه‌ له‌ به‌رزبوونه‌وه‌ی داهات، به‌شێوه‌یه‌ك له‌ مانگی ته‌موزدا بڕ‌ی داهات 560 ملیار به‌رز بووه‌ته‌وه‌.
سه‌رۆكی ده‌سته‌كه‌ ئه‌وه‌شی خسته‌ڕ‌وو: سه‌رۆكوه‌زیران رێنمایی داوه‌ هه‌ماهه‌نگیی ته‌واو له‌گه‌ڵ ده‌سه‌ڵاتی دادوه‌ری و لایه‌نه‌ چاودێرییه‌كان بكرێت و پێشینه‌ی سه‌ره‌كیش بدرێته‌ رێگریكردن له‌ قاچاخچێتیكردن به‌ مادده‌ هۆشبه‌ره‌كان و ده‌رمانه‌وه‌، به‌و پێیه‌ی هه‌ڕ‌ه‌شه‌ن بۆ سه‌ر ئاسایشی كۆمه‌ڵگه‌.

ده‌رباره‌ی پڕ‌ۆژه‌ ستراتیژییه‌كانیش، وائیلی روونیكرده‌وه‌، هه‌نگاو بۆ به‌ئه‌لیكترۆنیكردنی مامه‌ڵه‌كان و به‌ستنه‌وه‌یان به‌ سیسته‌می "ئاسیكۆدا" كراو، كه‌ ئامانج له‌م كاره‌ بۆ وردبینیكردنی پسووڵه‌ و بڕ‌وانامه‌ی سه‌رچاوه‌ی كه‌لوپه‌له‌كانه‌، له‌گه‌ڵ تاوتوێكردنی پلانه‌كانی پڕ‌ۆژه‌ی "ڕ‌ێگه‌ی گه‌شه‌پێدان" و كاراكردنی ترانزێت، به‌ جۆرێك پێگه‌ی عیراق وه‌ك پردێكی جوگرافی له‌نێوان ئه‌ورووپا و وڵاتانی كه‌نداو به‌هێزتر بكات.

PUKMEDIA