سەرۆکوەزیران و فەرماندەی سێنتکۆم: هێزی هاوپەیمانان لەوادەی خۆیاندا عیراق جێدەهێڵن

نوسینگەی راگەیاندن

بەشێکی کۆبوونەوەکە

سەرۆکوەزیرانی عیراق لەگەڵ فەرماندەی فەرماندەیی ناوەندی ئەمریکا کۆبووەوە و جەختیان لەپابەندبون بە وادەی کۆتاییهاتنی ئەرکی هاوپەیمانان لە عیراق کردەوە لەگەڵ کۆنترۆڵکردنی چەک لە دەستی دەوڵەتدا.

بەپێی راگەیەندراوێکی نوسینگەی راگەیاندنی سەرۆکوەزیرانی عیراق، عەلی زەیدی سەرۆکوەزیرانی عیراق و فەرماندەی گشتی هێزە چەکدارەکان پێشوازی کردووە لە چارلز براد کوپەر فەرماندەی فەرماندەیی ناوەندی ئەمریکا(سێنتکۆم)، لە دیدارێکیشدا سەرۆکوەزیرانی عیراق، جەختی لە پابەند بوون بە وادەی کۆتایی هاتنی ئەرکی هاوپەیمانان لە عیراق کردەوە، کە رۆژی 30ی9ی2026، وەک دواین وادە دیاریکراوە.

وتیشی: رۆژی 1ی10ی2026، رۆژێکی نوێ دەبێت بۆ عیراق، بەو پێیەی هیچ هێزێکی بیانی لە عیراق نامێنێت و سەروەری تەواو وەردەگرێتەوە، کە خۆی دەتوانێت پارێزگاری لە سەقامگیری وڵاتەکەی بکاتەوە.

لە بارەی چەکدانانی گروپەکانیشەوە، سەرۆکوەزیرانی عیراق، رایگەیاند: کۆکردنەوەی چەک تەنها لە دەستی دەوڵەتدا، هەمووان دەپارێزێت و سەروەری و دەسەڵاتی دەوڵەت پتەودەکات، هەروەها ئاسایش و سەقامگیریش گەرەنتی دەکات.

بەپێی راگەیەندراوەکەی نوسینگەی راگەیاندنی سەرۆکوەزیران، هەردوولایەن هاوڕابوون لەسەر پابەندبوون بە وادەی کۆتاییهاتنی ئەرکی سەربازی هاوپەیمانی نێودەوڵەتی کە پێشتر رێککەوتنی لەسەر کراوە.

PUKMEDIA