سبەینێ ئەنجومەنی نوێنەرانی عیراق کۆدەبێتەوە

راگەیاندنى ئەنجومەنى نوێنەران

ئەنجومەنى نوێنەرانى عیراق

بڕیارە سبەینێ ئەنجومەنی نوێنەرانی عیراق دانیشتنی ژمارە (8)ی ئاسایی خۆی ئەنجامبدات.

سبەینێ رۆژی یەکشەممە 9ی ئابی 2026، ئەنجومەنی نوێنەرانی عیراق دانیشتنی ژمارە (8)ی ئاسایی خۆی لە خولی شەشەمی هەڵبژاردن، ساڵی یەکەمی (وەرزى دووەم) سەعات یەکى پاشنیوەڕۆ ئەنجام دەدات.

بەپێى کارنامەى بڵاوکراوە دانیشتنەکە ئەم تەوەرانەی خوارەوە لەخۆدەگرێت:

1.تەواوکردنی خوێندنەوەی یەکەم بۆ پێشنیازەیاسای «چاودێریکردنی نەوجەوانان»، کە تەنها یەک ماددەی مابوو خوێندنەوەی بۆ بكرێت، ئەم یاسایە بە هەماهەنگی و لەلایەن لیژنەکانی (کار و رێکخراوەکانی کۆمەڵگەی مەدەنی)، (راژەی فیدراڵی)، و (گەنجان و وەرزش)ەوە ئامادەکراوە و پێشکەشکراوە.

2. ئەنجامدانی خوێندنەوەی یەکەم بۆ پێشنیازەیاسای هەمواری دووەمی «یاسای موختارەکان» (ژمارە 13ی ساڵی 2011) کە لە 8 ماددە پێکهاتووە، ئەم کارە بە هەماهەنگی لەلایەن لیژنەکانی (هەرێم و پارێزگاکان، پلاندانان و بەرنامەی حکومەت، ئەوقاف و کاروباری ئایینی، و ڕۆشنبیری و گەشتوگوزار)ەوە ئامادەکراوە و پێشکەشی پەرلەمان کراوە.

3. پێشکەشکردنی ڕاپۆرت و ئەنجامدانی تاوتوێکردن (خوێندنەوەی دووەم) بۆ پێشنیازەیاسای هەمواری 22ی «یاسای میلاک» (ژمارە 25ی ساڵی 1960). ئەم پڕۆژەیە و ڕاپۆرتە یاساییەکەی لەلایەن لیژنەی دارایی پەرلەمانەوە ئامادەکراوە بۆ ئەوەی بکەوێتە بەرباسی پەرلەمانتاران.


PUKMEDIA