نەتەوە یەكگرتووەكان: داعش هێشتا هەڕەشەیە

عیراق 11:36 AM - 2026-08-06

نەتەوە یەكگرتووەكان هۆشداریی دەدات لەوەی كە سەرەڕای بەردەوامی ئۆپەراسیۆنەكانی بەرەنگاربوونەوەی تیرۆرو بەئامانج گرتنی سەركردە باڵاكانیان، هێشتا داعش وەك هەڕەشەیەكی جددی بۆ سەر ئاشتی و ئاسایشی نێودەوڵەتی ماوەتەوە، چونكە خۆی لەگەڵ گۆڕانكارییەكاندا دەگونجێنێت.
 
ئۆگولگەرین نیازبەردیڤا، بەڕێوەبەری نووسینگەی جێگری سكرتێری گشتی بۆ بەرەنگاربوونەوەی تیرۆر لەنەتەوە یەكگرتووەكان، پێداچوونەوەی بەڕاپۆرتی 23 هەمینی ئەمینداری گشتی، سەبارەت بەمەترسییەكانی داعش بۆ سەر ئاشتی و ئاسایشی نێودەوڵەتی كردو تیشكی خستەسەر هەوڵەكانی نەتەوە یەكگرتووەكان بۆ پاڵپشتیكردنی وڵاتانی ئەندام لەڕوبەڕوبوونەوەی ئەم هەڕەشە پەرەسەندووە.
 
بەگوێرەی راپۆرتەكەش، چەند لایەنێكی سەر بە داعش تواناكانیان بەهێزتر كردووەو ئۆپەراسیۆنەكانیان فراوانتر كردووەو تاكتیكەكانیان پەرەپێداوە.
 

سوریا و باشووری ئاسیا

 
نێردەی نەتەوە یەكگرتووەكان تیشكی خستەسەر پێشهاتەكانی سوریاو رایگەیاند: كە گۆڕانكارییە سیاسی و ئەمنیی و هەڕەشەكان بەردەوامن، چونكە داخستنی كەمپی ئەلهۆڵ لەمانگی شوباتی ساڵی رابردوودا نیگەرانی ئەمنی جددی لێكەوتەوە، لەكاتێكدا تائێستا شوێنی هەزاران كەس نادیارە.
 

عیراق

 
هاوكات سەبارەت بە عیراق رایگەیاند: كە گوشارە بەردەوامەكانی دژە تیرۆر، تواناكانی داعشی بەشێوەیەكی بەرچاو كەمكردووەتەوە، بەڵام پاراستنی ئەو دەستكەوتانە پێویستی بە دامەزراوەی بەهێزو لێپرسینەوە هەیە، بە لەبەرچاوگرتنی ئەو هەلومەرجانەی كەدەتوانن رێگە بە گروپەكە بدەن دەست بە چالاكییەكانی بكاتەوە.


باشووری ئاسیا
 
لەباشووری ئاسیا خوراسانی داعش، وەك یەكێك لەلقە بەتواناكانی ئەو رێكخراوە ماوەتەوە، بەو پێیەی مەبەست و توانای خۆی نیشان دەدات بۆ پشتیوانیی كردنی هێرشەكان لەدەرەوەی ئەفغانستان، هاوكات سوود لەناسەقامگیریی ناوچەكە وەردەگرێت بۆ وەرگرتنی ئەندامی نوێ و پیلاندانان بۆ ئۆپەراسیۆنەكان و پاراستنی چالاكییەكانی.
 

هاوكاریی نێودەوڵەتی بەپەلە 

 
ئۆگولگەرین نیازبەردیێڤا، ئاماژەی بەوەشكرد: شەڕی دژ بەداعش پێویستی بە هەوڵی بەردەوام و خۆپارێزی و بەهێزكردنی هاوكاریی نێودەوڵەتی و ناوچەیی و پەسندكردنی وەڵامدانەوەی هەمەلایەنە لەسەر بنەمای یاسا نێودەوڵەتییەكان هەیە.
 

پشتگیریی لە قوربانییەكان 

 

پێش رۆژی جیهانی رێزگرتن لە قوربانیانی تیرۆر كە دەكەوێتە 21ی ئاب و تەوەری ئەمساڵیش "چاكبوونەوە لەڕێگەی یادەوەرییەوە"یە، خاتوو نیازبەردیێڤا رێزی لەقوربانیان و رزگاربووانی دەستی تیرۆر لەسەرانسەری جیهان گرت و وتی: ئازایەتی و خۆڕاگرییان بیرخستنەوەیەكە بۆ ئەوەی كە تیرۆر چەندە كاریگەریی لەسەر خەڵك هەیە.

وتیشی: بوێری و خۆڕاگری ئەوان بیرهێنانەوەیەكە بۆ ئەوەی كە تیرۆر چەندە كاریگەریی لەسەر خەڵك هەیە، هەروەها پێویستە بەرپرسیارێتی بەكۆمەڵمان بەرامبەر بەو كەسانە هەبێت كە ژیانیان بۆ هەمیشە بەهۆی توندوتیژی تیرۆریستییەوە گۆڕاوە.
 
PUKMEDIA