نرخی نەوت لە دابەزینی بەردەوامدایە

میدیاکان

دابەزینی نرخی نەوت

ئەمڕۆ 5ی8ی2026، بۆ رۆژی سێیەم نرخی نەوت لە دابەزینی بەردەوامدایە، بەشێوەیەک یەک بەرمیل نەوتی برێنت بە کەمتر لە 79 دۆلار مامەڵەی پێوە دەکرێت و چاوەکانیش لەسەر رێککەوتنی ئەمریکا و ئێران و کردنەوەی گەروی هورمزە.

بەپێی ماڵپەڕی(Oil Price)، نرخی نەوتی برێنت 39 سەنتی دیکە دابەزی و بە 78 دۆلار و 97 سەنت مامەڵەی پێوەدەکرێت.
هاوکات، نرخی نەوتی تەکساس 58 سەنتی دیکە دابەزی و بە 75 دۆلار و 19 سەنت مامەڵەی پێوە دەکرێت.

هۆکاری دابەزینی نرخی نەوت، بۆ لێدوانێکی دۆناڵد ترەمپ سەرۆکی ئەمریکا دەگەڕێتەوە، کە سێ رۆژ لەمەوپێش رایگەیاند: ئەو هێرشەی بڕیار بوو بکرێتە سەر ئێران، لەسەر داوای وڵاتانی ناوچەکە راگیراوە و ئێستا لە دانوستانداین، هاوکات دوێنێ وەزیری گەنجینەی ئەمریکا رایگەیاند: لەوەیە لە دوو رۆژی داهاتوودا رێککەوتن لەگەڵ ئێران ئیمزا بکەین و گەروی هورمزیش بکرێتەوە، ئەم پێشهاتانەش بوونە هۆی دابەزینی نرخی نەوت لە بازاڕەکانی جیهاندا.

PUKMEDIA