ئەندامێكی فراكسیۆنی یەكێتی داوای بەهەمیشەیی كردنی گرێبەستەكان دەكات

PUKMEDIA

پۆڵا شەهید سیروان دێڕ‌ەشەیی

پەرلەمانتارێكی فراكسیۆنی یەكێتی لەئەنجومەنی نوێنەرانی عیراق بە نوسراوی ر‌ەسمی داوا لەوەزیری دارایی عیراق دەكات، كارمەندانی گرێبەست لەحكومەتی هەرێمی كوردستان لەبودجەی 2027 بكاتە هەمیشەیی، بۆ ئەمەش لەناو ئەنجومەنی نوێنەرانی عیراق ئیمزای 109 ئەندامی پەرلەمان كۆدەكاتەوە. 

پۆڵا شەهید سیروان دێڕ‌ەشەیی، ئەندامی ئەنجومەنی نوێنەرانی عیراق لەفراكسیۆنی یەكێتیی نیشتیمانیی كوردستان، بە PUKMEDIA ی راگەیاند: لەنووسراوەكەمدا كە ئاڕاستەی وەزیری دارای عیراقم كردووە داوامكردوە بە پشتبەستن بەبڕ‌یاری دادگای فیدڕ‌اڵی مووچەی هاووڵاتیانی هەرێمی كوردستان دووربخرێتەوە لەململانێی سیاسیی، هەروەها داواشمكردووە كار بەشێوازی (مقاسە) لێبڕین بكرێت، بەڵام پێویستە مووچەی مووچەخۆرانی هەرێمی كوردستان زامن بكرێت .

راشیگەیاند: هەر لە نووسراوەكەدا داوامكردووە بە پشتبەستن بە ماددەی 14یی دەستوور، پێویستە جیاوازی لەنێوان فەرمانبەرانی هەرێمی كوردستان و پارێزگاكانی دیكەی عیراقدا نەكرێت، لەم ر‌وانگەیەشەوە پێویستە كارمەندانی گرێبەستی هەرێمی كوردستان بكرێن بەهەمیشەیی كە ژمارەیان نزیكەی 86 هەزار و 800 كارمەندە.

حكومەتی هەرێمی كوردستان لەئێستادا نزیكەی 87 هەزار كارمەندی بەشێوەی گرێبەست هەیە كەلە داهاتی ناوخۆ مووچەیان پێدەدات، بۆ چارەسەری ئەم كێشەیەش كە دەیان ساڵە كارمەندانی گرێبەست پێوەی دەناڵێنن، ئەندامێكی فراكسیۆنی یەكێتی لە بەغدادەوە هەوڵی چارەسەركردنی كێشەكانیان دەدات و لەئەنجومەنی نوێنەرانی عیراق 109 ئیمزای پەرلەمانتارانی بۆ داواكەی كۆكردوەتەوە و ئاڕاستەی وەزیری دارایی عیراق كردووە و داوای بەهەمیشەیی كردنی كارمەندانی گرێبەست دەكات كە بڕ‌ی پارەی دیاریكراو بۆیان نزیكەی 43 ملیار دیناری مانگانەیە.

PUKMEDIA