د.بڕیار رەشید: زیاتر لە 50 ئیمزامان بۆ بەهەمیشەییکردنی گرێبەستەکان کۆکردووەتەوە

PUKMEDIA

د. بڕیار ڕەشید ئەندامی ئەنجومەنی نوێنەرانی عیراق

بەمەبەستی کۆتاییهێنان بە کێشەی فەرمانبەرانی گرێبەستی هەرێمی کوردستان و بە هەمیشەیی کردنیان، بەشێک لە ئەندامانی ئەنجومەنی نوێنەرانی عیراق داواکارییەکیان ئاڕاستەی سەرۆکی ئەنجومەنەکە کردووە، ئەندامێکی ئەنجومەنی نوێنەرانی عیراقیش دەڵێت: ئیمزای زیاتر لە 50 پەرلەمانتارمان کۆکردووەتەوە و سەرۆکی پەرلەمانیش ئیمزای لەسەر داواکارییەکەمان کردووە.

د. بڕیار ڕەشید ئەندامی ئەنجومەنی نوێنەرانی عیراق بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: داوامان کردووە گرێبەستەکانی هەرێمی کوردستان لەسەر میلاکی هەمیشەیی، لە پڕۆژەیاسای بودجەی فیدراڵیدا جێگیر بکرێن.

راشیگەیاند: بۆ پشتگیریی داواکارییەکەشمان، ئیمزای زیاتر لە 50 پەرلەمانتارمان کۆکردووەتەوە و سەرۆکی پەرلەمانیش ئیمزای لەسەر داواکارییەکەمان کردووە و ئاراستەی لیژنەی دارایی کردووە.

د. بڕیار ڕەشید ئاماژەی بەوەشکرد، ئامانجمان لەم داواکارییە دەستەبەرکردنی مافی ئەو گرێبەستانەیە، کە ماوەیەکی درێژە لە خزمەتدان و بەهۆی قەیرانە دارایییەکانەوە نەکراون بە هەمیشەیی، هیوادارین بە پاڵپشتی هەموو لایەنەکان، بتوانین لە پەرلەمان تێیبپەڕێنین.

ئەمەش لەکاتێکدایە، بە جێبەجێکردنی داواکارییەکە زیاتر لە 86 هەزار فەرمانبەری گرێبەست لە هەرێمی کوردستان سوودمەند دەبن، کە مووچەکانیان مانگانە نزیکەی 43 ملیار دینارە و داواکراوە بۆ ساڵی داهاتوو بخرێتە بودجەی عێراقەوە، ئەم هەنگاوەش دەبێتە چارەسەرێکی ریشەیی بۆ کۆتاییهێنان بە کێشەی فەرمانبەرانی گرێبەست.

PUKMEDIA