گەڕی سێیەمی جەنگی ئەمریکا و ئێران بەردەوامە

میدیاکان

بەرردەوامی هێرشەکان

گەڕی سێیەمی جەنگی نێوان ئەمریکا و ئێران بەردەوامە، سێنتکۆم رایدەگەیەنێت: چەندین هێرشیان بۆ سەر ناوچە جیاوازەکانی ئێران ئەنجامداوە و ئێرانیش وەڵامی هێرشەکانی دایەوە و بنکەی سوپای ئەمریکای لە ئوردن و بەحرەین بە ئامانج گرت.

سەرلەبەیانی ئەمڕۆ 24ی7ی2026، سوپای ئەمریکا رایگەیاند: لە شەوی سیانزەمینی هێرشەکان، چەند پێگەیەکی ئێران بۆردومان کراوە.

هاوکات، فەرماندەی ناوەندی ئەمریکا ناسراو بە سێنتکۆم، لە راگەیەندراوێکیدا کە لە پلاتفۆڕمی ئێکس بڵاویکردووەتەوە، ئاشکرای کردووە: هێرشەکان زیاتر لە دوو سەعاتی خایاندووە و ئامانجیش لە هێرشەکان، وەک وەڵامێک بووە بە هەڕەشەکانی ئێران بۆ سەر کەشتییەکان.

لەلایەکی دیکەوە، میدیاکانی ئێران، بڵاویان کردەوە، لە ناوچەکانی ئەهواز و ئەندیمشک و ئومێدیە لە باشوری رۆژئاوای وڵات، دەنگی چەندین تەقینەوە بیستراوە، ئەمە جگە لەوەی چەندین تەقینەوە لە نزیک دورگەی قشم لە گەروی هورمز نزیک شاری بەندەر عەباس روویداوە.

 لە بەرامبەریشدا، سوپای ئێران، چەند بنکەیەکی ئەمریکای لە ئوردن و بەحرەین بە ئامانج گرت.
لە راگەیەندراوێکیدا، سوپای ئێران، ئاشکرای کرد: بە فڕۆکەی بێفڕۆکەوان، هەردوو بنکەی شێخ عیسا لە بەحرەین و بنکەی ئەزرەق لە ئوردن بە ئامانج گیراون.

دەشڵێت: لە هێرشەکەدا کۆگەی چەک و شوێنی مانەوەی سوپای ئەمریکا بە ئامانج گیراون.

ئەمەش لەکاتێکدایە، ئەمریکا و ئێران لە 11ی4ی2026، لە پاکستان بۆ یەکەمجار دەستیان بە دانوستانی ئاشتی نێوانیان کرد، بەڵام بۆ رۆژی دواتر شکستی دانوستانەکانیان راگەیاند، دواتریش چەندین گەڕی دانوستانیان بەردەوام بوو، تاوەکو لە 22ی6ی2026، لە سویسرا یاداشتی لێکتێگەیشتنیان ئیمزا کرد، بەڵام لە 8ی7ی2026دا، جارێکی دیکە، ئاڵۆزی و جەنگ لە نێوان هەردوو وڵات دەستپێکردەوە.

PUKMEDIA