وەزارەتی دارایی فیدڕاڵی: لە گەڕاندنەوەی پارەکان دەبێت مافی گەنجینە پارێزراو بێت

PUKMEDIA

لۆگۆی وەزارەتی دارایی عیراق

وەزارەتی دارایی عیراق رایدەگەیەنێت: ڕۆڵی ئەوان لە گەڕاندنەوەی پارەی گەندەڵکاران، تەنیا لە لایەنە داراییەکان و پاراستنی مافی خەزێنەی گشتیدا کورت دەبێتەوە، دەشڵێت: گەراندنەوەی پارەکان دەبێت بە جۆرێک بێت کە مافی گەنجینەی گشتی مسۆگەر بکات.

وەزارەتی دارایی عیراق، لە راگەیەندراوێکیدا سەبارەت بە کەیسەکانی گێڕانەوەی ئەو پارانەی لە ڕێگەی گەندەڵییەوە براون ئاماژەی بەوەکردووە: لەبەر ڕۆشنایی بەیاننامەکەی دوێنێی ئەنجومەنی باڵای دادوەری، وەزارەتی دارایی جەخت دەکاتەوە کە لە دۆسیەکانی پێوەست بە گێڕانەوەی پارە دزراوەکان، دەسەڵاتی ئەوان تەنیا چاودێریکردنی لایەنی دارایی و مسۆگەرکردنی مافی دەوڵەتە.
دەشڵێت:هەر میکانیزمێک بۆ دانەوەی ئەو پارانەی لەسەر سزادراوان ماونەتەوە، دەبێت بە جۆرێک بێت کە تەواوی مافەکانی خەزێنەی گشتی مسۆگەر بکات،هەروەها بڕیارێکی پابەندکەر و جێبەجێکراو بێت، ئەمە جگە لەوەی پێویستە سەرجەم سەروەت و سامانی گشتی و مافەکانی دەوڵەت بپارێزێت.

سەبارەت بە لێخۆشبوون لە تۆمەتباران، وەزارەتی دارایی فیدڕاڵی رایگەیاندوە: " هەر رێکارێکی یاسایی لە تایبەتمەندی دادگاکانە، کە دەسەڵاتەکانی خۆی پیادە دەکات.
لە کۆتایشدا، وەزارەتی دارایی، دووپاتی کردووەتەوە، کە هەماهەنگی تەواو لەگەڵ دەسەڵاتی دادوەری و چاودێری دەکات، بۆ ئەوەی سامانی گشتی بەپێی یاساکان بپارێزن.

ئەمەش لەکاتێکدایە، رۆژی 10-7-2026 ئەنجومەنی باڵای دادوەریی عیراق راگەیەندراوێکی رەسمی لەسەر رێکارەکانی تایبەت بە کەیسی گەورە گەندەڵیی "دزینی سەدە" بڵاوکردەوە و تێیدا ئاماژەی بەوە کرد کە ئامانجی دادگا تەنها سزادانی گەندەڵکاران نییە، بەڵکو گەڕاندنەوەی پارە دزراوەکانی دەوڵەتیشە.

PUKMEDIA