وەزیری دارایی فیدڕاڵی: ئامادەکارییەکانی یاسای بوودجەی 2027 بەردەوامە

راگەیاندنی وەزارەت

وەزیری دارایی فیدراڵی لەگەڵ لیژنەی دارایی ئەنجومەنی نوێنەران

وەزیری دارایی عیراق، ئاشکرای دەکات: بەردەوامن لە ئامادەکردنی ڕەشنووسی یاسای بوودجەی گشتیی فیدراڵی بۆ ساڵی 2027، بۆ ئەوەی لە ئایندەیەکی نزیکدا بەرزیبکەنەوە بۆ ئەنجومەنی وەزیران و دواتریش پێشکەشی ئەنجومەنی نوێنەرانی بکەن بەمەبەستی پەسەند کردنی.

بەپێی راگەیەندراوێکی فەرمانگەی ڕاگەیاندنی ئەنجومەنی نوێنەرانی عیراق، لیژنەی دارایی ئەنجومەنەکە بە سەرۆکایەتی عودەی عەواد و بە ئامادەبوونی ئەندامانی لیژنەکە، میوانداری فالح ساری وەزیری داراییان کردووە،ئامانجیش لە میوانداریکردنەکە بۆ تاوتێکردنی دۆخی دارایی و ئابووری و میکانیزمەکانی داڕشتنی بوودجەی 2027 بووە.

وەزیری دارایی  لەو میواندارییەدا، ئاماژەی بەوە کرد : وەزارەتەکەی کۆمەڵێک کاری لەپێشینەی داناوە، لەوانە: بەدیجیتاڵکردنی بەشەکانی وەزارەت، دامەزراندنی دەستەیەکی پسپۆڕ، گۆڕینی قۆناغ بە قۆناغی سیستمی بوودجە لە "بوودجەی بڕگەکان"ەوە بۆ "بوودجەی بەرنامە و پڕۆژەکان".

وتیشی: ئەم سیستمە نوێیە لە چەند پارێزگایەک وەک نموونەی سەرەتایی جێبەجێ دەکرێت و دواتر بۆ هەموو پارێزگاکان گشتاندنی پێدەکەین.

هەر لەو میواندارییەدا، گفتوگۆ کراوە لەسەر میکانیزمەکانی زیادکردنی داهاتی گشتی، کاراکردنی سیستمی ئەلیکترۆنیی گومرگی (ئەسیکۆدا)، و ئەگەری هەموارکردنەوەی چەند یاسایەکی پەیوەندیدار،ئەمە جگە لەوەی کاردەکەن  بۆ دامەزراندنی سندووقی گەشەپێدان و سندووقی وزە، بە مەبەستی بەهێزکردنی گەنجینەی گشتی.

لە کۆتایی میواندارییەکەدا، گفتوگۆی چڕ لەبارەی دۆسیە داراییەکان کرا و جەخت لەسەر دۆزینەوەی چارەسەری گونجاو بۆ دۆسیەی کارمەندانی گرێبەست و خاوەن کرێی ڕۆژانە کرایەوە بە شێوازێک کە سەقامگیری دارایی و ئابووری وڵات بپارێزێت.

PUKMEDIA