دیلان غەفور: مووچەی مانگی حوزەیران خەرجدەکرێت

PUKMEDIA

دیلان غەفور ئەندامی لیژنەی دارایی لە ئەنجومەنی نوێنەرانی عیراق

ئەمڕۆ 7ی7ی2026، لیژنەی دارایی ئەنجومەنی نوێنەرانی عیراق لەگەڵ فالح ساری وەزیری دارایی عیراق کۆبووەوە و تێیدا گفتووگۆیان لەبارەی بودجەی داهاتوو کرد بە هەماهەنگی لەگەڵ ئەنجومەنی نوێنەران و بانکی ناوەندی، هاوکات وەزیری دارایی عیراق بەڵێنیدا مووچەی مانگی حوزەیرانی مووچەخۆرانی هەرێمی کوردستان بنێرێت.

لەوبارەیەوە دیلان غەفور ئەندامی لیژنەی دارایی لە ئەنجومەنی نوێنەرانی عیراق لەکۆنگرەیەکی رۆژنامەوانیدا رایگەیاند: هەرچەندە کۆبوونەوەکە تایبەت نەبوو بە مووچەی مووچەخۆرانی هەرێمەوە، بەڵام ئێمە وەک ئەندامانی کورد لە لیژنەی دارایی داوامان لێکرد روونکردنەوەمان بداتێ لەسەر مووچە، لەبەرامبەردا وەزیری دارایی عیراق پێی راگەیاندین، موچه‌ی مانگی حوزەیران خه‌رج ده‌كرێت، بۆ موچه‌ی مانگی ئایندەش‌ كارنامه‌یه‌ك هه‌یه‌ كه‌ پێویستی بە رەزامەندی ئەنجومەنی وەزیرانە.

راشگەیاند: مانگی پێشووش وه‌زیری دارایی عیراق له‌سه‌ر ده‌سه‌ڵاتی خۆی موچه‌ی ناردووه‌، چونكه‌ ئه‌و بڕگانه‌ی كه‌ له‌ رێككه‌وتنه‌كه‌دا هه‌ن له‌لایه‌ن حكومه‌تی هه‌رێمه‌وه‌ وه‌كو خۆی جێبه‌جێ نه‌كراون، کە گرنگترینیان ناردنی 120 ملیار دیناری داهاتی نانه‌وتییه‌ كه‌ حكومه‌تی هه‌رێم ناتوانێت ئه‌و بڕه‌ بدات، ئه‌مەش‌ پێویسته‌ هه‌موار بكرێت و بڕێكی چه‌سپاو نه‌بێت.

ئەمەش لەکاتێکدایە، ،  رۆژی 26ی5ی2026 وه‌زاره‌تی دارایی هه‌رێمی كوردستان، مووچه‌ی مانگی ئایاری دابه‌شكرد، كه‌ هاوكات بوو له‌گه‌ڵ جه‌ژنی قوربان، له‌ دوای ئه‌و به‌رواره‌شه‌وه‌ تائه‌مڕۆش 7ی7ی2026 مووچه‌ دابه‌شنه‌كراوه‌ و كاتی ناردنیشی له‌لایه‌ن عیراقه‌وه‌ دیار نییه‌، به‌مه‌ش مووچه‌خۆران ده‌بێت زیاتر چاوه‌ڕ‌وانی هاتنی مووچه‌ بن كه‌ زیاتر لە 40 رۆژه‌ مووچه‌یان وه‌رنه‌گرتووه‌.


PUKMEDIA