دابه‌شكردنی مووچه‌ زیاتر دواده‌كه‌وێت

PUKMEDIA

پارەی عیراقی

ماوه‌ی زیاتر له‌ چل رۆژه‌ فه‌رمانبه‌رانی هه‌رێمی كوردستان مووچه‌یان وه‌رنه‌گرتووه‌ و هێشتا كاتی دابه‌شكردنی مووچه‌ی مانگی حوزه‌یرانیش دیار نییه‌، هۆكاری دابه‌شنه‌كردنی مووچه‌ش بۆ نه‌بوونی پاره‌ی كاش له‌عیراق و كێشه‌ی داهاتی ناوخۆ له‌نێوان عیراق و هه‌رێمی كوردستانه‌.

هه‌فته‌ی رابردوو، چه‌ند وه‌فدێكی وه‌زاره‌تی دارایی حكومه‌تی هه‌رێم، بۆ پرسی مووچه‌ و داهاتی نانه‌وتی سه‌ردانی به‌غدایان كردبوو، به‌ڵام سه‌ردانی وه‌فده‌كه‌ نه‌بووه‌ هۆی ناردنی مووچه‌، به‌پێی به‌دواداچوونه‌وه‌كانی PUKMEDIA ، هۆكاری نه‌ناردنی مووچه‌ی مانگی حوزه‌یران بۆ هه‌رێم بۆ نه‌بوونی پاره‌ی كاش له‌عیراق و نه‌ناردنی داهاتی نانه‌وتی له‌لایه‌ن هه‌رێمی كوردستانه‌وه‌ ده‌گه‌ڕێته‌وه‌.

 به‌پێی زانیارییه‌كانی PUKMEDIA، وه‌زاره‌تی دارایی فیدراڵی به‌ نیازه‌ مانگانه‌ له‌گه‌ڵ مووچه‌ی پارێزگاكانی دیكه‌ی عیراق، مووچه‌ی هه‌رێمییش بنێریت، به‌ڵام نه‌ناردنی 120 ملیار دیناری داهاتی نانه‌وتی و نه‌بوونی پاره‌ی كاش كێشه‌ی بۆ مووچه‌ دروستكردوه‌.

ئه‌مه‌ش له‌كاتێكدایه‌، وه‌زاره‌تی دارایی هه‌رێم چه‌ند جارێك به‌ ره‌سمی رایگه‌یاندووه‌، توانای دابینكردنی 120 ملیار دینار مانگانه‌یان نییه‌ بیده‌نه‌ عیراق، چونكه‌  به‌هۆی گرژییه‌كانی ناوچه‌كه‌ و سیستمی ئه‌سیكۆداوه‌ داهات كه‌می كردووه‌.

پێشتریش له‌و باره‌یه‌شه‌وه‌، سروه‌ محه‌مه‌د ئه‌ندامی ئه‌نجومه‌نی نوێنه‌ران له‌ فراكسیۆنی یه‌كێتی به‌ PUKMEDIA ی راگه‌یاندبوو: داهاتی نانه‌وتی هه‌رێم، هه‌میشه‌ بووه‌ته‌ كێشه‌ بۆ مووچه‌ی مووچه‌خۆران و ئه‌ركی حكومه‌تی كاربه‌ڕ‌ێكه‌ری هه‌رێمه‌، پابه‌ندییه‌كانی جێبه‌جێبكات و پابه‌ندی رێككه‌وتنه‌كان بێت.

وه‌زاره‌تی دارایی هه‌رێمی كوردستان، له‌ رۆژی 26ی5ی2026، مووچه‌ی مانگی ئایاری دابه‌شكرد، كه‌ هاوكات بوو له‌گه‌ڵ جه‌ژنی قوربان، له‌ دوای ئه‌و به‌رواره‌شه‌وه‌ تائه‌مڕۆ 6ی7ی2026 مووچه‌ دابه‌شنه‌كراوه‌ و كاتی ناردنیشی له‌لایه‌ن عیراقه‌وه‌ دیار نییه‌، به‌مه‌ش مووچه‌خۆران ده‌بێت زیاتر چاوه‌ڕ‌وانی هاتنی مووچه‌ بن كه‌ 40 رۆژه‌ مووچه‌یان وه‌رنه‌گرتووه‌.

PUKMEDIA