تاکەر کارڵسن لە پارتی کۆماری جیابووەوە و پارتێکی نوێ دادەمەزرێنێت

thehill

تاکەر کارڵسن

تاکەر کارڵسن، رۆژنامەنووس و شرۆڤەکاری ناوداری ئەمریکی، جیابوونەوەی خۆی لە پارتی کۆماری رایگەیاند و ئاشکراى کرد، بە ئامانجی کۆتاییهێنان بە سیستمی دوو پارتی لە ویلایەتە یەکگرتووەکانی ئەمریکادا بەمزووانە پارتێکی سیاسیی نوێ دادەمەزرێنێت.

کارڵسن کە بە یەکێک لە دەنگە سەرەکی و کاریگەرەکانی راستڕەوی ئەمریکا دادەنرێت، پارتی کۆماری و ئیدارەی دۆناڵد ترەمپی بە "خیانەتکردن لە وڵات و خزمەتکردن بە بەرژەوەندییەکانی ئیسرائیل" تۆمەتبار کرد، هۆکاری سەرەکی بڕیارەکانیشى گەڕاندەوە بۆ ناڕەزایەتییەکانی بەرامبەر بە هەڵوێستی واشنتۆن لە جەنگی ئێراندا، ناوبراو ئاماژەی بەوەش کرد، دیموکراتەکانیش دەستیان لەم جەنگە زیانبەخشانەدا هەیە و لە ئێستادا هیچ کام لەو دوو پارتە نوێنەرایەتیی راستەقینەی گەلی ئەمریکا ناکەن.

کارڵسن لە چاوپێکەوتنێکی رۆژنامەوانیدا جەختی لەوە کردەوە، ئەو واقیعەی ئێستا لە ئەمریکادا هەیە دیموکراسی نییە، بەڵکو سیستمێکی تاک حزبییە کە خۆی وەک دیموکراسی نمایش دەکات، روونیشی کردەوە، ئەولەویەتی ئەو پارتە نوێیەى دایدەمەزرێنێت کارکردن دەبێت لەسەر پرسە راستەقینەکانی وەک راگرتنی جەنگەکان و چۆنیەتی دابینکردنی بودجە، تێیدا پێویستە بەرژەوەندییەکانی ئەمریکا بخرێنە پێشەوە نەک شەڕکردن بۆ ئیسرائیل یان هەر وڵاتێکی دیکە.

هەرچەندە کارڵسن تا ئێستا ناو و کاتی رەسمیی راگەیاندنی پارتەکەی ئاشکرا نەکردووە، بەڵام چاودێران پێشبینی دەکەن دروستکردنى ئەم پارتە ببێتە پێگەیەکی بەهێز بۆ بەشداریکردنی ناوبراو لە هەڵبژاردنی سەرۆکایەتیی ئەمریکا بۆ ساڵی 2028 و بەهۆی ناوبانگ و جەماوەرە بەرفراوانەکەیەوە، چاوەڕوان دەکرێت دەنگێکی زۆر بەدەستبهێنێت، بەتایبەت کە پەرەسەندنی جەنگی ئێران و سیاسەتەکانی ئەمدواییەی ئیدارەی ئەمریکا، ناڕەزایەتییەکی قووڵی لە ناوخۆی ئەو وڵاتەدا دروست کردووە.

PUKMEDIA