وەفدێکی مەکتەبی راگەیاندن و هۆشیاری سەردانی هونەرمەند حیکمەت هیندی دەکەن

تایبەت

وێنەیەکى سەردانەکە

ئەمڕۆ چوارشەممە 24ى6ى2026 وەفدێکی مەکتەبی راگەیاندن و هۆشیاری سەردانی هونەرمەند حیکمەت هیندی دەکەن.

لە چوارچێوەی گرنگیدانی زیاتر بە هونەرمەندان و نووسەران و کەسایەتییە دیارەکانی گەلەکەمان کە خاوەنی بەخششی روناکبیرین، پێشنیوەڕۆی ئەمڕۆ وەفدێکی مەکتەبی ناوەندی راگەیاندن و هۆشیاری کە بریتی بوون لە هەڤاڵان شوان کەریم کابان و د.عەدالەت عەبدوڵڵا یاریدەدەرانی لێپرسراوی مەکتەب و مامۆستا ئەنوەر قەرەداغی و تانیا کەمال لێپرسراوی پەیوەندییەکانی مەکتەب و بورهان شێخ رەئوف بەرپرسی ژووری محاورون، سەردانی هونەرمەندی دیاری گەلەکەمان و شاری سلێمانی مامۆستا حیکمەت هندی-یان کرد.

لە دیدارێکدا وەفدی مەکتەب جگە لە پێشکەشکردنی چەپکە گوڵی رێزلێنان، لە نزیکەوە لە تەندروستیی مامۆستا حیکمەت-یان پرسیوە و مێژووی پرشنگداری کارە هونەرییەکانیان بەرز نرخاند و پاڵپشتیی مەکتەبیان بۆ دەربڕی و هیوایان خواست کە لە کاروانی هونەریی خۆیدا بەردەوام بێت، لە بەرامبەردا مامۆستا حیکمەت خۆشحاڵیی زۆری خۆی بۆ هاتنی وەفدەکەی مەکتەب دەربڕی و سوپاسی رۆڵی مەکتەب و بۆرد و کەناڵەکانی کرد کە گرنگی بە چالاکییەکانی دەدەن، لە بەشێکی دیدارەکەشدا ستۆدیۆی مامۆستا حیکمەت بەسەرکرایەوە و نوێترین کارەکانییان لە بواری هونەری شێوەکاریدا بینی و مامۆستا حیکمەتیش چەند تابلۆیەکی بە دیاری بەخشییە وەفدەکەی مەکتەب.

PUKMEDIA