لەڕۆژانی جەژندا زیاتر لە 6 هەزار نەخۆش سەردانی نەخۆشخانەکانیان کردووە

PUKMEDIA

بەڕێوەبەرایەتی گشتی تەندروستی سلێمانی

لە ڕۆژانی جەژنی قوربان 6هەزار و 873 نەخۆش سەردانی نەخۆشخانە و ناوەندە تەندروستیەكانی سلێمانی یان كردووە و لەو ژمارەیەش هەزار و 250 نەخۆش داخڵ كراون و 580 نەشتەرگەری ئەنجام دراون.

بەڕێوەبەرایەتی گشتی تەندروستی سلێمانی رایگەیاند: لەڕۆژانی جەژنی قوربان 4هەزار و 515 نەخۆش سەردانی نەخۆشخانەی شاریان كردووە و لەو ژمارەیەش 959 نەخۆش داخڵ كراون و 449 نەشتەرگەری فریاكەوتن و كتوپڕ كراون و 76 نەشتەرگەری تر ئەنجام دراون، هەروەها 17هەزار 487 پشكنینی تاقیگەیی كراوە و هەزار و 493 تیشك گیراوە و 7 قەستەرە كراوە.

هاوکات 435 نەخۆش سەردانی نەخۆشخانەی منداڵبوونی فێركاری یان كردووە و 72 منداڵ لەدایكبوون كە 49 منداڵیان بە سروشتی لەدایكبوون و 23 منداڵیان بە نەشتەرگەری لەدایكبوون، هەروەها لە نەخۆشخانەی سووتاوی و نەشتەرگەری جوانكاری 161 نەخۆش سەردانیان كردووە و 2 نەخۆش داخڵ كراون.

هەر لە رۆژانی جەژنی قورباندا لە نەخۆشخانەی د.جەمال ئەحمەد ڕەشیدی منداڵان هەزار و 788 منداڵ بینراون و 187 منداڵ داخڵ كراون و چارەسەری پێویستیان بۆ كراوە، هاوکات لە نەخۆشخانەی كۆئەندامی هەرس و جگەری فێركاری  31 نەخۆش پێویستیان بە فریاكەوتنی خێرا هەبووە و چارەسەریان بۆ كراوە.

هاوکات، لە نەخۆشخانەی دڵ 104 نەخۆش داخڵ كراون و چارەسەریان بۆ كراوە و 35 نەشتەرگەری قەستەرە و 19 دانانی باڵۆن و 1 پەیس مەیكەر ئەنجام دراون، تیمەكانی سەنتەری فریاكەوتنی خێرای 122 لە ڕۆژانی جەژن 70 حاڵەتی گەرمی بە هاناوەچوونی برینداری ڕووداوەكانی هاتوچۆ و كەوتنەخوارەوە و ڕووداوە جیاجیاكان و 200 حاڵەتی بەهاناوەچوونی ئاساییان بۆ هاووڵاتیان لە شوێنە گشتیەكان ئەنجام داوە.

PUKMEDIA