تەقەکەرەکەی نزیک کۆشکی سپی گیانی لەدەستدا

ئاژانسی واع

شوێنی رووداوەکە

وتەبێژی دەزگای خزمەتگوزاری نهێنی ئەمریکا رایگەیاند: ئەو پیاوەی لە نزیک هێڵی ئەمنیی کۆشکی سپی چەکێکی لە جانتاکەی دەرهێناوە و تەقەی کردووە، پاش ئەوەی لەلایەن کارمەندانی دەزگای خزمەتگوزاری نهێنی ئەمریکاوە تەقەی لێ کراوە، گیانی لەدەستدا.

ئەنتۆنی گولیێڵمی، وتەبێژی دەزگای خزمەتگوزاری نهێنی ئەمریکا لە بەیاننامەیەکدا رایگەیاند: پیاوێک لە نزیک هێڵی ئەمنیی کۆشکی سپی چەکێکی لە جانتاکەی دەرهێناوە و تەقەی کردووە لە خاڵێکی پشکنینی ئەمنیی نزیک کۆشکی سپی لە واشنتۆن، راستەوخۆ کارمەندانی دەزگای خزمەتگوزاری نهێنی ئەمریکا وەڵامیان داوەتەوە و تەقەیان لێکردووە و گومانلێکراوەکەیان بریندار کردووە، پێش گواستنەوەی بۆ نەخۆشخانە گیانی لەدەستداوە.

دۆناڵد ترەمپ، سەرۆکی ئەمریکا لە کاتی ڕووداوەکەدا لە ناو کۆشکی سپیدا بووە، و دەزگای خزمەتگوزاری نهێنیش دووپاتی کردەوە کە سەرۆک هیچ کاریگەرییەکی ئەم ڕووداوەی بەرنەکەوتووە.

میدیاکانی ئەمریکا بڵاویانکردەوە، کە گومانلێکراوەکە ناوی (ناسیر بست)ە و تەمەنی 21 ساڵە و خەڵکی ویلایەتی مێریلاندە، ئاماژەیان بەوەشکردووە کە پێشتر لەلایەن دەسەڵاتدارانەوە ناسراو بووە لە ڕووداوەکانی پێشووی پەیوەندیدار بە دەوروبەری کۆشکی سپی.

PUKMEDIA