سەرۆکى ئەمریکا: ئەگەرەکان بۆ رێککەوتن لەگەڵ ئێران پەنجا بە پەنجایە

Reuters

دۆناڵد ترەمپ سەرۆکى ئەمریکا

سەرۆکی ئەمریکا رایدەگەیەنێت: گفتوگۆکان لەگەڵ ئێران خەریکە دەگەنە کۆتایی و هەردوو لا زۆر نزیک بوونەتەوە لە گەیشتن بە رێککەوتننامەیەک بۆ کۆتاییهێنان بە ململانێکان.

دۆناڵد ترەمپ سەرۆکى ئەمریکا بە کەناڵى CBSى  راگەیاند: لەگەڵ ئێران لە رێککەوتن نزیک بووینەتەوە و رۆژ بە رۆژ شتەکان باشتر دەبن، بەڵام وردەکارى رێکەوتنەکەى باس نەکرد.

سەرۆکى ئەمریکا جەختى کردەوە، کە رێککەوتنی کۆتایی بەجۆرێکە رێگە نادات ئێران خاوەنی چەکی ئەتۆمی بێت و ئاماژەى بە ئەوەشدا، چارەسەرێک بۆ ئەو یۆرانیۆمەی ئێران پیتاندوویەتی دەدۆزنەوە و تەنها کاتێکیش رێککەوتننامەکە ئیمزا دەکەن کە ئەوەى دەیانەوێت بەدەستى بهێنن.

دۆناڵد ترەمپ سەرۆکی ئەمریکا وتیشى، ئەگەر نەگەینە رێککەوتن، ئەوا دۆخێک دروستدەبێت کە هیچ وڵاتێک هێندەی ئێران بە سەختی لێی نادرێت.

هەر سەبارەت بە رێککەوتنى ئەمریکا و ئێران لە لێدوانێکی دیکەیدا دۆناڵد ترەمپ سەرۆکى ئەمریکا رایگەیاند: ئەگەرەکان پەنجا بە پەنجایە، واتا یان رێککەوتنێکی باش دەکەین، یان هەموو شتێکیان لێ وێران دەکەین.

ئەمەش لە کاتێکدایە، واشنتۆن تایمز رایگەیاند، بڕیارە ئەمریکا و ئێران لە ماوەی 24 سەعاتی داهاتوودا رێککەوتنی ئاشتی ئیمزا بکەن.

هاوکات مارکۆ روبیۆ وەزیری دەرەوەی ئەمریکا رایگەیاند، دانوستاندنەکان پێشکەوتنیان بەخۆیەوە بینیوە و ئێستاش گفتوگۆکردن لەسەر پرسى رێککەوتن بەردەوامە و ئەگەری دەستپێکردنەوەی هێرشەکانی ئەمریکاشى بۆ سەر ئێران رەتنەکردەوە.

PUKMEDIA