ترەمپ هۆشداری توند دەداتە ئێران و دانوستانەکانیش گەیشتوونەتە بنبەست

Reuters

دۆناڵد ترەمپ، سەرۆكی ئەمریكا

دۆناڵد ترەمپ، سەرۆكی ئەمریكا هۆشداری دەداتە ئێران و دەڵێت: كات دەڕوات، ئەمەش لەكاتێكدایە كە وتوێژەكان بۆ كۆتایی هێنان بەجەنگ گەیشتوونەتە بنبەست.

دۆناڵد ترەمپ، سەرۆكی ئەمریكا، لەپۆستێكدا لە تروس سۆشیاڵ هۆشداری دەداتە ئێران و رایدەگەیەنێت: واباشترە بە خێرایی بجوڵێن، چونكە كات زۆر گرنگەو دەڕوات.

لەلایەكی دیكەوە، میدیاكانی ئێران بڵاویانكردەوە، كە ئەمریكا لە وەڵامی دوایین پێشنیارەكانی تاران بۆ كۆتاییهێنان بە ململانێكان، هیچ سازشێكی كۆنكرێتی نەكردووە.

هاوكات ئاژانسی هەواڵی میهر رایگەیاندووە: نەكردنی سازش لەلایەن واشنتنەوە دەبێتە هۆی ئەوەی دانووستانەكان بگەنە بنبەست.

هاوكات سەرۆكی ئەمریكا سەرەتای ئەم هەفتەیە هۆشداری دابوو كەئاگربەستەكە لەدۆخی مردن و ژیاندایە، دوای ئەوەی داواكارییەكانی تارانی رەتكردەوەو بە تەواو قبوڵنەكراو وەسفی كردن.

لەلایەكی دیكەوە ئیسماعیل بەقایی، وتەبێژی وەزارەتی دەرەوەی ئێران، پێداگری لەسەر ئەوە كرد كە داواكارییەكانی ئەوان "بەرپرسانە" بوون.

بەپێی ڕاپۆرتی ئاژانسی هەواڵی تەسنیم"ی ئێرانی، داواكارییەكانی ئێران پێكهاتوون لە: كۆتاییهێنانی دەستبەجێی جەنگەكە لە هەموو بەرەكاندا ــ كە ئاماژەیە بۆ بەردەوامی هێرشەكانی ئیسرائیل بۆ سەر حزبوڵای سەر بە ئێران لە لوبنان ــ ڕاگرتنی گەمارۆی دەریایی ئەمریكا لەسەر بەندەرەكانی ئێران و گەرەنتی نەدانی هیچ هێرشێكی دیكە بۆ سەر ئێران.

هەروەها باس لەوەش كراوە كە داواكارییەكانیان بریتی بوون لە داواكردنی قەرەبووكردنەوەی زیانەكانی شەڕ و جەختكردنەوە لەسەر سەروەری ئێران بەسەر گەرووی هورمزدا.

هاوكات ئاژانسی هەواڵی "فارس"ی ئێران رۆژی یەكشەممە رایگەیاند: كە واشنتن پێنج مەرجی لە وەڵامی پێشنیارەكەی تاراندا داناوەو بەپێی راپۆرتەكان، مەرجەكان پێكهاتبوون لە داواكارییەك كە ئێران تەنها یەك وێستگەی ئەتۆمی بە چالاكی بهێڵێتەوە و كۆگای یۆرانیۆمی پیتێندراوی ئاستی بەرزی خۆی بگوازێتەوە بۆ ئەمریكا.

لەلایەكی دیكەوە دۆناڵد ترەمپ رۆژی هەینی ئاماژەی بەوەدا كە ڕازی دەبێت بە ڕاگرتنی بەرنامە ئەتۆمییەكەی ئێران بۆ ماوەی 20 ساڵ ــ كە خاڵێكی سەرەكی ناكۆكی نێوان هەردوو وڵاتە ــ ئەمەش وەك پشتڕاستكردنەوەی گۆڕانكارییەك لە هەڵوێستی ئەمریكادا دەركەوت لە بری داواكاری پێشووی بۆ كۆتاییهێنانی تەواوەتی بە بەرنامەكە.

PUKMEDIA سەرچاوە: BBC