ئه‌مریكا دۆسیه‌ نهێنییه‌كانی ته‌نه‌ فڕ‌یوه‌كان و بوونه‌وه‌ره‌ ئاسمانییه‌كانی بڵاوكرده‌وه‌

U.S. Department of War

وێنەیەکى ته‌نه‌ فڕ‌یوه‌ نه‌ناسراوه‌كان

وه‌زاره‌تی جه‌نگی ئه‌مریكا بۆ یه‌كه‌مجار زیاتر له‌ 160 دۆسیه‌ی نهێنی ده‌رباره‌ی ته‌نه‌ فڕ‌یوه‌ نه‌ناسراوه‌كان و بوونه‌وه‌ره‌ ئاسمانییه‌كان بڵاوكرده‌وه‌.

له‌هه‌نگاوێكی مێژوویی و كتوپڕ‌دا، وه‌زاره‌تی جه‌نگی ئه‌مریكا (پێنتاگۆن) كۆمه‌ڵێك دۆسیه‌ی هه‌ستیاری په‌یوه‌ست به‌ ته‌نه‌ فڕ‌یوه‌ نه‌ناسراوه‌كان و ژیان له‌ ده‌ره‌وه‌ی زه‌وی بڵاوكرده‌وه‌.

ئه‌م هه‌نگاوه‌ له‌چوارچێوه‌ی به‌رنامه‌یه‌كی دۆناڵد تره‌مپ، سه‌رۆكی ئه‌مریكادایه‌ بۆ ئاشكراكردنی دیارده‌ نائاساییه‌كان، كه‌ پێشتر به‌ڵێنی بڵاوكردنه‌وه‌ی دابوو.

وه‌زاره‌تی جه‌نگی ئه‌مریكا ر‌ایگه‌یاندوه‌: ئه‌م زانیارییانه‌ به‌ هه‌ماهه‌نگی له‌گه‌ڵ كۆشكی سپی، ناسا، ئێف بی ئای و ده‌زگا هه‌واڵگرییه‌كان كۆكراونه‌ته‌وه ‌و له‌ ر‌ێگه‌ی سایتێكی تایبه‌ته‌وه‌ به‌رده‌ست ده‌خرێن.

به‌ڵگه‌نامه‌كان نووسراوی گفتوگۆی كه‌شتیوانانی ئاسمانی له‌خۆده‌گرن كه‌ تێیدا باس له‌بینینی ته‌نه‌ نامۆكان ده‌كه‌ن، بۆ نموونه‌، له‌ گه‌شتی "ئه‌پۆلۆ 12"دا باس له‌ بینینی "تیشكی ر‌ووناكی" له‌ بۆشایی ئاسمان كراوه‌، هه‌روه‌ها له‌ دواین گه‌شتی مانگ "ئه‌پۆلۆ 17"، كه‌شتیوانان ئاماژه‌یان به‌ بینینی ته‌نۆلكه‌ی ر‌ووناكی گه‌ش كردووه‌ كه‌ له‌ئاسۆدا ده‌سووڕ‌انه‌وه‌، وێنه‌كان سێ خاڵ نیشان ده‌ده‌ن كه‌ به‌شێوه‌ی سێگۆشه‌ له‌ئاسمانی مانگدا ڕ‌یز بوون.

وه‌زاره‌تی جه‌نگی ئه‌مریكا به‌ڵێنی داوه‌ كه‌ له‌ چه‌ند هه‌فته‌ی داهاتوودا، به‌ شێوه‌یه‌كی خولیی به‌ڵگه‌نامه‌ی زیاتر له‌ ژێر په‌رده‌ی نهێنی بهێنێته‌ ده‌ره‌وه‌ و بۆ ر‌ای گشتی بڵاویان بكاته‌وه‌.

وه‌زاره‌ته‌كه‌ ئاماژه‌ بۆ ئه‌وه‌ده‌كات:"خه‌ڵكی ئه‌مریكا ئێستا ده‌توانێت ده‌ستیان بگات به‌ فایله‌ نهێنییه‌كانی حكومه‌تی فیدراڵی UAP" كه‌ ئاماژه‌ی به‌ دیارده‌ نائاساییه‌ نه‌ناسراوه‌كان كردووه‌، كه‌ زاراوه‌یه‌كی مۆدێرنن بۆ UFO كه‌ "نوێترین ڤیدیۆ، وێنه‌ و به‌ڵگه‌نامه‌و سه‌رچاوه‌ ره‌سه‌نه‌كانی UAP "ی تێدایه‌.

PUKMEDIA