کوردێک دەبێتە وتەبێژی سەربازیی رۆژهەڵاتی سووریا

PUKMEDIA

هلزوار میتانی وتەبێژی سەربازیی ناوچەی رۆژهەڵاتی سورریا

هێزەکانی سووریای دیموکرات (هەسەدە) دەستبەکاربوونی "هلزوار میتانی" وەک وتەبێژی سەربازیی ناوچەی رۆژهەڵاتی سورریا راگەیاند، ئەم بڕیارەش لە چوارچێوەی میلاکی وەزارەتی بەرگری و رێککەوتنە نوێیەکانی یەکخستنی هێزە سەربازییەکاندا دێت.

فەرهاد شامی، وتەبێژی گشتى هێزەكانی سوریای دیموكرات (هەسەدە) ئاشکراى کرد: هلزوار میتانی وەك بەرپرسی راگەیاندنی سەربازیی رۆژهەڵاتی سوریا لە وەزارەتی بەرگری دەستبەكار بووە، ئەم هەنگاوە دوای زنجیرەیەک لێکتێگەیشتن دێت بۆ جێگیرکردنی پێگەی رەسمیی هێزەکانی رۆژئاوای کوردستان لە چوارچێوەی سیستەمی بەرگریی وڵاتدا.

لەم بارەیەوە، سیپان حەمۆ یاریدەدەری وەزیری بەرگری سوریا رایگەیاندبوو، پرۆسەی تێكەڵكردنی هێزەكانی سوریای دیموكرات (هەسەدە) لەگەڵ سوپای سوریا و تەواوكردنی پێكهاتەكەی، بەرەوپێشونی باشی بەخۆوە بینیوە و تا ئێستاش  چوار لیوای هەسەدە بە رەسمى لەگەڵ سوپای سوریا تێكەڵكراون، قۆناغی داهاتووش بریتی دەبێت لە تەواوكردنی هەیكەلی رێكخراوەیی سوپا و یەكخستن و جێگیركردنی هێزەكان.

ئەم گۆڕانکارییانە لە کاتێکدایە، هێزەكانی سوریای دیموكرات (هەسەدە) و حكومەتی كاتیی سوریا لە 29ی كانوونی دووەمی ئەمساڵ رێكەوتنێكیان ئیمزاكرد‌ و لە 2ی شوباتەوە كەوتووەتە بواری جێبەجێكردنەوە، رێككەوتنەكە جگە لە ئاگربەستی نێوان هەردوولا، نەخشەڕێگایەکی قۆناغەبەندی بۆ یەکخستنی هێزە سەربازییەکان لەخۆدەگرێت، کە پۆستەکەی "هلزوار میتانی" یەکێکە لە دەرەنجامە دیارەکانی ئەو پرۆسەیە.

PUKMEDIA