سبەینێ یەکەم دانیشتنی دادگاییکردنی جەلادێکی زیندانی نوگرە سەلمان بەڕێوەدەچێت

PUKMEDIA

عەجاج

بڕیارە سبەینێ پێنج شەممە 7ى5ى2026 یەکەم دانیشتنى دادگایى کردنى عەجاج یەکێک لە گەورە تاوانبارانى ئەنفال لە بەغداد بەڕێوەبچێت، کە زیاتر لە 200کەس وەک شایەتحاڵ لە دادگایى کردنەکەیدا ئامادە دەبن.

بە پێى وتەى پارێزەرانى دۆسیەکە دادگایى کردنەکە لە دادگاى باڵاى تاوانەکانى عیراق لە رەسافە ئەنجامدەدرێت و بە پێى ئەو وتانەى لێى وەرگیراوە، عەجاج دانى بە ئەوەداناوە کە لەگەڵ دەستگیرکراوانى ناو زیندانى نوگرە سەلمان کە خۆى لێپرسراوى زیندانەکە بووە زۆر خراپ بووە و مامەڵەى نەشیاو و نامرۆڤانەى لەگەڵ زیندانیەکان کردووە.

بە پێى زانیاریەکانى PUKMEDIA  لە دانیشتنەکەى سبەینێى دادگاییەکەدا بانگێشتنامە بۆ زیاتر لە 200 کەس وەک شایەتحاڵ نێردراوە، بۆ ئەوەى بەشدار بن لە شایەتیدان دژى عەجاج.

لە ماوەى رابردوودا رۆژنامەی سەباحی عیراقی دەقی چاوپێکەوتنێکی لەگەڵ عەجاج بەرپرسی زیندانی نوگرەسەلمان لە سەردەمی رژێمی پێشوودا بڵاوکردەوە و لەچاوپێکەوتنەکەدا وتی،"لە ساڵی 1989 بووم بە لێپرسراوی زیندانی نوگرەسەلمان، کە 400 زیندانیکراوی عەرەبی لێبوو، دوای ئەوەی زیندانەکە بەتاڵ کرا، چوار هەزار هاووڵاتی کوردی بۆ هێنرا".


هەر لەچاوپێکەوتنەکەدا عەجاج دانی بە زۆرینەی تاوانەکانیدا ناو وتی: برسیکردنمان وەک چەک بەکاردەهێنا، کە هیچ لە هێرشی سەربازی کەمتر نەبوو، لە ماوەی 10 مانگدا دوو لەسەر سێی زیندانیکراوەکان گیانیان لەدەستدا.

هەر لە سات و وەختى دادگایى کردنى عەجاج-دا ئەمڕۆ چوار شەممە 6ى5ى2026 لە ساڵۆنى کوردستانى نوێ خوێندنەوە بۆ کتێبى "عەجاج جەلادێک لە دۆسیەى ئەنفالدا" کرا، کە کتێبەکە تایبەت بوو بە کۆکردنەوەى کۆمەڵە وتارێک دەربارەى دۆسیەى ئەنفال کە لە لایەن "محەمەد حەمە ساڵح تۆفیق، لەتیف فاتیح، سالار مەحمود، عارف قوربانى، عومەر محەمەد، رزگار عومەر، عەلى مەحموود، دەرسیم پێشەوا، عەدالەت عومەر، سمکۆ سابیر، د.فاتیح سەنگاوى، فاتح سلێمان، هێمن حەسیب، حسێن عەزیز" نوسرابوون و لە لایەن "سالار مەحموود و لەتیف فاتح و محەمەد حەمە ساڵح" بە ئامادەبوونى میوانێکى زۆر خوێندنەوە بۆ کتێبەکە کرا و تێیدا تیشک خرایە سەر تاوانە قێزەونەکانى عەجاج لە زیندانى نوگرە سەلمان.

تاوانبار "عەجاج ئەحمەد حەردان" یەكێك بووە لە سەرپەرشتیارانی زیندانی نوگرە سەلمان لە پارێزگای سەماوە لە باشوری عیراق و رۆژی 31ی 7ی 2025، هەواڵی دەستگیركردنی لەلایەن نوسینگەی خانمی یەكەمی پێشووى عیراقەوە راگەیەندرا و داواش لە زیندانیكراوان و كەسوكاری زیندانیكراوان و بێسەرشوێنبووەكان كرا پەیوەندیان پێوەبكەن بۆ تۆماركردنی سكاڵا دژی ئەو تاوانبارە.

PUKMEDIA