جێگرى پارێزگارى سلێمانى: چەند کەناڵێکى راگەیاندن سلێمانى بە ئامانج دەگرن

PUKMEDIA

وێنەیەکى کۆنگرە رۆژنامەوانییەکە

شاهۆ عوسمان جێگرى پارێزگارى سلێمانى رایگەیاند: چەندین جار سلێمانى لە لایەن دەزگاکانى راگەیاندنەوە بەئامانج گیراوە، وتیشى: بەو کەناڵە و پەیامنێرەکەیان دەڵێین، لە داواى لێبووردن کردن لە سلێمانى و خەڵکەکەى و مێژووەکەى دوانەکەون.   

ئەمڕۆ دووشەممە 4ى5ى2026 شاهۆ عوسمان جێگرى پارێزگارى سلێمانى لە کۆنگرەیەکى رۆژنامەوانیدا سەبارەت بە پرسیارى پەیامنێرێکى کەناڵێکى راگەیاندن کە لە سەرۆکى وڵاتێکى گەورەى جیهان و لە دەرەوەى وڵات کردى، رایگەیاند: ئەمە یەکەمجار نییە هەندێک لە کەناڵەکانى راگەیاندن و بەتایبەت بە ئاڕاستەکردنى لایەنێکى سیاسى دیاریکراو وەک رقێک بەرامبەر شارى سلێمانى ئەم جۆرە کارانە دەکەن ئێمە لە رابردوش وەڵاممان بۆ ئەو جۆرە کارانە و کەناڵ و پەیامنێرانە هەبووە و ئێمە ئەوە بە کارێکى رۆژنامەوانى و کارێکى پڕۆفیشناڵ نابینین، کە شارێک بە ئامانج بگیرێت. 

ئەوەشى خستەڕوو: دەکرا ئەم کەناڵەى راگەیاندن و پەیامنێرەکانیان کاتێک بابەتێک رەهەندێکى ناوخۆیى هەیە، لە ناوخۆ  و لە کوردستاندا بەدواداچوون و پرسیار بکەن و راستى ئەو بابەتەش بۆ هەموو جیهان روونبوەوە، کە لە سلێمانى ئەو جۆرەکارانە نەکراوە و ناکرێت.

باسى لەوەش کرد: بەو کەناڵە و پەیامنێرەکەیان دەڵێین، لە داواى لێبووردن کردن لە سلێمانى و خەڵکەکەى و مێژووەکەى دوانەکەون، ئەگەر چى لە سلێمانى باشترین پانتایى ئازادى رۆژنامەوانى لەسەر ئاستى هەرێمى کوردستان و عیراق هەیە، ناچار دەبین ئەگەر داواى لێبووردن نەکرێت و ئەو جۆرە رەفتارانە دووبارە ببنەوە رێکارى یاسایى بەناوى سلێمانى بگرینەبەر، کە مافى خۆمانە وەکو ئیدارەی خۆجێیى سلێمانى.

ئاماژەى بە ئەوەشدا: چەندجارى دیکە لە رێگاى دەزگاى راگەیاندنەوە و بەهۆى بەکارهێنانى زانیارى نادروست و بەبێ گەڕانەوە بۆ ئێمە وەکو ئیدارەى سلێمانى و فەرمانگەکانمان سلێمانى بە ئامانج گیراوە.

روونیکردەوە: داواکارین کەناڵەکانى راگەیاندن و لایەنە سیاسییەکان دەست لەوە هەڵبگرن کە شارێک و بەتایبەت شارى سلێمانى بە ئامانج بگرن، لە رابردوو لە رێى پەیجە رەسمى و نارەسمییەکانەوە سلێمانى بە ئامانج گیراوە، بەڵام خۆشبەختانە سلێمانى و مێژووەکەى و خەڵکەکەى بەو جۆرە کارە میدیایانە نە بچووک دەبنەوە و نە ناشیرین دەبن. 


وتیشى: کاروکاردانەوە هەیە و هەندێکجار وەڵامى ئەو کارانە دەدرێتەوە، بەڵام هەولێر و دهۆک و هیچ شارێک بە ئامانج نەگیراوە و سلێمانى هەمیشە پەیامى ئاشتى و پێکەوە ژیان و ئازادى کارى رۆژنامەوانى هەبووە، هاوکات لەگەڵ ئەوەدا نین کە ململانێى سیاسى بگاتە ئەو ئاستەى کە شارەکان بە ئامانج بگیرێن.


PUKMEDIA