سەندیکای رۆژنامەنوسان: لەبەردەم مزگەوتەکان بابەتی سیاسی مەوروژێنن

PUKMEDIA

سەندیکای رۆژنامەنوسان

لقی سلێمانی سەندیکای رۆژنامەنوسانی کوردستان رێنمایی لەسەر سازنەدانی کۆنگرەی میدیایی لەبەردەم مزگەوتەکان بڵاودەکاتەوەو رایدەگەیەنێت: بەڕێزەوە داوا لە سەرجەم وتەبێژو بەرپرسانی حزبی و سیاسی و حکومی و ئیداری دەکەین کە لەبەردەم مزگەوتەکان و شوێنی عیبادەت و پرسەکان بابەتی سیاسی نەوروژێنن.

دەقی پەیامەکە...

ماوەیەکە لە شاری سلێمانی و دەوروبەری، دیاردەیەکی زۆر دەگمەن بە میدیاو دنیای رۆژنامەوانی دەبینرێت، لە ھیچ جێگایەکی تری دنیادا نەبوەو نەکراوە بەردەم پرسەگەو مزگەوتەکان ببنە مینبەری میدیا و سیاسەت،  دەیان کەناڵ کۆدەبنەوەو پرێس کۆنفرانسێک ساز دەکەن بۆ قسەکەرێک کە بە نیازی پرسەو سەردانی کەسوکاری کۆچکردوو ھاتوە، نەک ئامادەسازبێت بۆ لێدوان و قسەکردن لەسەر پرسی سیاسەتی ئەو سەعاتەو ئەو رۆژە ..

لقی سلێمانی سەندیکای رۆژنامەنووسانی کوردستان بەسەرجەم کەناڵەکانی سنوری لقەکە رادەگەیەنێت، ئەم دیاردەیە شارستانیی نیەو ناوازە و دەگمەنەو نابێت رێزی مردوو رێزی کەسوکاری مردوو  و ئازادیی پرسەکەرانی تر قۆرغ بکرێن و بەردەم مزگەوتەکانیش ببێتە مینبەرو  گۆڕەپانی میدیا و سیاسەت و ململانێ..

بەڕێزەوە داوا لە سەرجەم وتەبێژو بەرپرسانی حزبی و سیاسی و حکومی و ئیداری دەکەین کە لەبەردەم مزگەوتەکان و شوێنی عیبادەت و پرسەکان بابەتی سیاسی نەوروژێنن، دەشێت ئەو تەوەرانە لە کات و شوێنی تایبەت بە پرێس کۆنفرانس بێت وەک ئەوەی لە ھەموو دنیا دەگوزەرێت،، نەک ناو پرسەکان و بەردەم دەرگای مزگەوتەکان..
 پرسە لەلای ئێمەی کورد سروتێکی پیرۆزی ھەیە، ھیوادارین میدیاکارە بەڕێزەکان و بەرپرسانی خۆشەویستیش ھۆکار نەبن بۆ تێکدانی ئەم کلتورو سروتە جوانەو ئەم رێنماییەمان بە دیدێکی شارستانییەوە لێوەربگرن..

لقی سلێمانی 
سەندیکای رۆژنامەنووسانی کوردستان
30/4/2026

PUKMEDIA