رەحمان خانی: چاوەڕوانی سەرڕێژبوونی سەرجەم بەنداوەکانین

راگەیاندنی وەزارەتی کشتوکاڵ

بەنداوی دوکان

بەهۆی زۆری بارانبارین لەئەمساڵدا بڕی ئاوی کۆکراوەی پۆند و بەنداوەکانی بەرێژەیەکی بەرچاو زیادیان کردووە، بەجۆرێک لەکۆی 25 بەنداو 22 بەنداو لەهەرێمی کوردستان سەرڕێژبوون و چاوەڕواندەکرێت هەفتەی داهاتوو بەنداوێکی دیکەش سەرڕێژ ببێت، بەڕێوەبەری بەنداوەکانی هەرێم-یش رایدەگەیەنێت: تا ئێستا 22 بەنداو سەرڕێژ بوون و سێ بەنداویش ماون سەرڕێژ ببن.

رەحمان خانی بەڕێوەبەری بەنداوەکانی هەرێمی کوردستان بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند: لەهەرێمی کوردستان 25 بەنداومان هەیە کە تا ئێستا 22 بەنداویان سەرڕێژ بوون و سێ بەنداویش ماون سەرڕێژ ببن کە بریتین لە بەنداوەکانی( دەربەندیخان و دوکان و گۆمەسپان).

راشیگەیاند: چاوەڕواندەکرێت لەچەند رۆژی داهاتوودا بەنداوی دەربەندیخان سەرڕێژ ببێت و بەنداوی دوکانیش کەمتر لە 5 مەتری ماوە بەشێوەیەکی ستونی بۆ سەرڕێژبوون، هیوادارین بتوانیین لەکۆتایی وەرزی گلدانەوەی ئەمساڵ بگەینە ئاستی باش لەو بەنداوە.

ئەمەش لەکاتێکدایە، بەهۆی زۆریی ئاستی ئاوی کۆکراوە لە بەنداو و پۆندەکان، دەتوانین بڵێین بۆ ئەمساڵ هەرێمی کوردستان لە دۆخی ئاسایشی ئاو لە ساڵێکی سەلامەتدایە، کە لە بواری کشتوکاڵ و ئاوی ژێر زەوی چەندین بواری دیکەدا سوودێکی زۆر لەو سەرچاوەی ئاوانە وەردەگیرێت.

PUKMEDIA