مەکتەبی سیاسی یەکێتی: خەباتی بێوچانمان بۆ بە نێودەوڵەتیکردنی کەیسی ئەنفالە

PUKMEDIA

لۆگۆی یەکێتیی نیشتمانیی کوردستان

مەکتەبی سیاسیی یەکێتیی نیشتمانیی کوردستان، لە 38 هەمین ساڵیادی تاوانی ئەنفالدا پەیامێکی بڵاوکردەوە و رایگەیاند: یەکێتی لە رێی دامودەزگاکانی حکومەتی هەرێم و فیدراڵەوە خاوەندارێتی هەمیشەیی لە ماف و شایستەکانی قەرەبووکردنەوەی ماددی و مەعنەوەی و خزمەتکردنی کەسوکاری ئەنفالکراوان و خەڵکە خۆراگرەکەمان دەکاتەوە و دووپاتیشی دەکاتەوە: خەباتی بێوچانیشمان بۆ بە نێودەوڵەتیکردنی کەیسەکە  وەک جینۆساید و تاوانی دژی مرۆڤایەتی چڕ تر دەکەینەوە .

دەقی پەیامەکەی مەکتەبی سیاسیی:

ئەنفال  زامێکی قووڵە  لە جەستەی نەتەوە و نیشتمان خەمێکی  هەمیشەیی  کوردستانی و ئینسانییە.
ئەمساڵ کە سی و هەشت ساڵ بەسەر ئەو تاوانە کۆمەڵکوژیەدا تێدەپەرێت کە بە هەشت قۆناغی پڕ ناسۆر دژی گەلەکەمان بەرپا کرا و هەزاران هەزار ژن و پیاو و منداڵی کورد کرانە قوربانی سیاسەتی رژێمی دڕندەی بەعس، تەئکید لەسەر  بڕیاری دادگای باڵای تاوانەکان دەکەینەوە کە ئەنفالی بە تاوانی جەنگ و دژە مرۆیی ناساندووە و خەباتی بێوچانیشمان  بۆ بە نێودەوڵەتیکردنی کەیسەکە  وەک جینۆساید و تاوانی دژی مرۆڤایەتی چڕ تر دەکەینەوە.

یەکێتیی نیشتمانیی کوردستان لە رێی دامودەزگاکانی حکومەتی هەرێم و فیدراڵەوە خاوەندارێتی هەمیشەیی لە ماف و شایستەکانی قەرەبووکردنەوەی ماددی و مەعنەوەی و خزمەتکردنی کەسوکاری ئەنفالکراوان و خەڵکە خۆراگرەکەمان دەکاتەوە و بێ درێغ هەوڵیان  بۆ دەدات .

لەیادی ئەو کارەساتەدا سەری رێز بۆ گیانی پاکی شەهیدانمان  دادەنوێنین.
درود بۆ خۆڕاگریی كەسوكاری  بێسەرو شوێنبوانی ئەنفال.

مەکتەبی سیاسیی
یەکێتیی نیشتمانیی کوردستان

PUKMEDIA