لە یادی 47 ساڵەی شەهیدان عەلی هەژار و كاردۆ گەڵاڵی

کوردستانى نوێ

شەهیدان عەلی هەژار و كاردۆ گەڵاڵی

هەردوو سەركردەی دیاری یەکێتى و بزووتنەوەی سۆسیالیستی كوردستان و شۆڕشی نوێ، هەردوو تێكۆشەری شۆڕشی ئەیلول و پارێزەر و رۆشنبیری گەلەكەمان شەهیدان (عەلی هەژار  و  كاردۆ گەڵاڵی)  لە رۆژی 9ى4ى1979 لەلایەن ئەمن و جەللادەكانی بەعسەوە لەناو هۆڵی دادگای هەولێر فڕێندران و تا ئێستاش بێ هەواڵ و بێ سەروشوێنن.

شەهید عەلی هەژار

شەهید عەلی عەبدوڵڵا عەلی  ناسراو بەعەلی هەژار، ساڵی 1943 لە گوندی (عەوێنە)ی پارێزگای  هەولێر لە دایكبووە،  ساڵی 1962 پەیمانگەی مامۆستانی هەولێری تەواو كردووە و ساڵی 1976 كۆلێژی یاسای لە زانكۆی موستەنسریەی بەغداد تەواوكردووە، پاشان لە دادگای هەولێر پارێزەرایەتی كردووە.

ئەندامی یەكێتی نووسەران و رۆشنبیرانی كورد بووە، ئەندامی سەندیكای پارێزەران و  یەكێتی مامۆستایان بووە، ئەندامی كۆمەڵەی هونەرە جوانەكانی كورد و ئەندامی یەكێتی رۆژنامەنوسان بوو.

لە هەرەتی لاویەوە پەیوەندی بە بزونتەوەی كوردایەتیەوە كردووە، لە ژیانی سیاسیدا بەلێوەشاوەیی خۆی چەندین پلە و لێپرسراوێتی پێسپێردراوە، لەوانە: ماوەیەك لە سەردەمی شۆڕشی ئەیلول بەرپرسی باڵای یەكێتی قوتابیان بووە، بەرپرسی یەكێتی جوتیارانی كورد، بەرپرسی لقی دوو، لقی هیران و نازەنین، ئەندامی لیژنەی دانوستان، ئەندامی لیژنەی ناوەندی پارتی دیموكراتی كوردستان بووە، ئەندامی دەستەی دامەزرێنەری بزوتنەوەی سۆسیالیستیش بووە.

پاش نسكۆی  شۆڕشی كورد لە ساڵی 1975دا، یەك لەو كەسانە بووە، كە باوەڕی تەواوی بە بەردەوامی شۆڕش و خەباتی سیاسی كورد هەبووە، لەگەڵ ژمارەیەك لە كادیر و خەباتگێڕانی ئەو كات كەوتنە جموجۆڵ و بڕیاریاندا بە درێژەدان بەشۆڕش وە ئەركی بەرەنگاری بگرنە ئەستۆ و درێژە بەخەبات بدەن.

دواتریش دلێرانە رووبەڕووی دووژمنانی بەعس دەبووەوە و لەنێو شاری هەولێردا دەیان چالاكی رێكخراوەیی ئەنجام داوە.

شەهید كاردۆ گەڵاڵی

شەهید كاردۆ عەبدولقەهار مستەفا  ناسراو بە كاردۆ گەڵاڵی، ساڵی 1951 لە گوندی (كەردز)ی شارۆچكەی قوشتەپەی پارێزگای هەولێر لە دایكبووە، قۆناغی سەرەتایی لە گوندەكەی خۆی و ناوەندی و ئامادەیشی لە هەولێر تەواوكردووە.

پاشان چوەتە كۆلێژی یاسا لە زانكۆی بەغداد، ساڵی 1974 كە وتووێژی نێوان سەركردایەتی شۆڕشی ئەیلول و رژێمی بەعس بەبنەبەست گەیشت، وازی لە خوێندن هێنا و روویكردە شاخ، لە نسكۆی شۆڕشیش ساڵی 1975 گەڕایەوە شار و چووەوە هەمان كۆلێژ و درێژەی بەخوێندندا و  لە ساڵی 1978دا سەركەوتوانە یاسای تەواوكرد و وەك پارێزەرێك نوسینگەی لە شاری هەولێر كردەوە.

لەگەڵ پۆلێک لە تێكۆشەرانی رێگای كوردایەتی لەنێو بزووتنەوەی سۆسیالیستی كوردستان خۆیان رێكخستەوە و جاڕی شۆڕشیان دایەوە، چالاكانە كەوتە گەڕ لە پێناوی هەڵساندنەوەی دوای نسكۆ، بۆیە دلێرانە كەوتە جموجۆڵی سیاسی و رێكخستن و رۆڵێكی دیاریشی بینی لە دامە‌زراندنی بزوتنەوەی سۆسیالیستی كوردستاندا، هەروەها رۆڵی كاریگەرانەی هەبووە لە لەناو توێژی خوێندكاراندا.

هاوڕێی نزیك و هاوخەبات و هاوپیشە و دڵسۆز و متمانەپێكراوی یەكتری بوون لەگەڵ شەهید عەلی هەژاردا.

رۆژی 9ى4ى1979 لەناو هۆڵی دادگادا لەلایەن هێزێكی زۆری ئەمنی هەولێرەوە فڕێندران.
لەبەر ئەوەی شوێنبزر و چارەنووس نادیارن، رۆژی دەستگیركردنەكەیان بە رۆژی شەهیدبوونیان دیاریكراوە.

PUKMEDIA