مامۆستایەکی زانکۆ: کۆچکردنی کتوپڕی فلامینگۆکان مژدەی ژیانەوەی نوێیە

تایبەت

کۆچی فلامینگۆکان بۆ هەرێم

مامۆستایەکی زانکۆ سەبارەت بە هاتنی فلامینگۆکان بۆ دەربەندی ڕانیە و زێی بچووک دەنووسێت: کۆچکردنی کتوپڕی فلامینگۆکان بۆ ناوچەی ڕانیە نیشانەیەکی ڕووحی بەهێز و مژدەی "ژیانەوەی نوێیە" بۆ ناوچەکەمان.

د.ژینۆ خالید محەمەد مامۆستای زانکۆ سەبارەت بە هاتنی فلامینگۆکان بۆ دەربەندی ڕانیە و زێی بچووک دەڵیت: کۆچکردنی کتوپڕی فلامینگۆکان بۆ ناوچەی ڕانیە نیشانەیەکی ڕووحی بەهێز و مژدەی "ژیانەوەی نوێیە" بۆ ناوچەکەمان. ئەم باڵندانە کە لە مێژوودا وەک هێمای "قەقنەس" و نوێبوونەوە ناسراون، گەیشتنیان بەم دەشت و دەرە ئاماژەیە بۆ کۆتایی قۆناغێکی سست و دەستپێکی سەردەمێکی پڕ لە وزە و گەشبینی. وەستانە بێدەنگ و پڕ لە هاوسەنگییەکەیان لەسەر یەک قاچ لە ناو ئاوەکانی دەربەندی ڕانیەدا، پەیامێکی رووحییە بۆ هەموومان کە لە کاتی گۆڕانکارییە گەورەکاندا هاوسەنگی و ئارامیی خۆمان بپارێزین و تەنها تیشک بخەینە سەر لایەنە ئەرێنییەکانی ژیان.

ئاماژە بەوەشدەکات: لە ڕووی ژینگەییەوە، ئەم کۆچە دەگمەنە "موعجیزەیەکی سروشتییە" کە بەهۆی گۆڕانی کەشوهەوا و دۆزینەوەی پەناگەیەکی ئارام لە کوردستاندا ڕوویداوە. جا چ لە دەریاچەی ورمێوە هاتبن یان لە گەشتێکی دوور و درێژی نێوان قاڕەکاندا بن، هەڵبژاردنی ئاوەکانی ڕانیە و زێی بچووک نیشانەی پاکبوونەوە و دەوڵەمەندیی ژینگەی ناوچەکەیە. بینینی ئەم "کاروانە پەمەییانە" هەلێکی زێڕینە بۆ ئێمە تا زیاتر نرخی سروشتە جوانەکەی کوردستان بزانین و وەک هێمایەکی پیرۆز بۆ پێکەوەژیان و جوانیی داهاتوو سەیری بکەین، لەم باروو دۆخە ئالۆزە ئەمە مژدەی خۆشی هێنەرە.

PUKMEDIA