خوێندنی ئۆنلاین و دیجیتاڵی لەهەرێمی کوردستان دەستپێدەکات

راگەیاندنی وەزارەتی پەروەردە

پرۆسەی خوێندنی ئۆنلاین

لەچەند رۆژی داهاتوودا خوێندنی ئۆنلاین و دیجیتاڵی لەهەرێمی کوردستان بۆ خوێندکارانی وەزارەتی پەروەردە و خوێندنی باڵا دەستپێدەکات، بەڕێوەبەری تەلەفزیۆنی پەروەردەیی-ش دەڵێت: سەرجەم پرۆگرامی وانەکان بۆ هەموو قۆناغەکان ئامادەکراون دەست بە پەخشکردنیان دەکەین.

ئاسۆی جەمال موختار بەڕێوەبەری تەلەفزیۆنی پەروەردەیی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: لەئێستادا لەهەوڵی رێکخستنی پرۆگرامێکی گشتگیرین بۆ پەخشکردنی سەرجەم وانەکانی قۆناغە جیاجیاکانی پرۆسەی خوێندن لەوەزارەتی پەروەردە و لەچەند رۆژی ئایندەدا سیستمی ئۆنلاین و دیجیتاڵ بۆ خوێندکاران دەستپێدەکەین.

راشیگەیاند: هەر سێ کەناڵی پەروەردە لە (هەولێر و سلێمانی و دهۆک) بەپێی ئەو پڕۆگرامەی دیاریدەکەین پەخشی وانەکان دەکات و قوتابیان و خوێندکاران دەتوانن لەڕێگەی کەناڵەکانمانەوە درێژە بەخوێندنی ئەمساڵیان بدەن.

بەڕێوەبەری تەلەفزیۆنی پەروەردەیی ئاماژەی بەوەشکرد، قوتابیان و خوێندکاران دەتوانن لەڕێی کەناڵ و پەیجی فەیسبووک و یوتیوبی کەناڵی پەروەردەوە ئاگاداری خشتەی پەخشکردنی وانەکان بن، هەروەها هەر لەو رێگەیەوە بینەری وانەکان بن.

ئەمەش لەکاتێکدایە، دوێنێ 29ی3ی2026 وەزارەتی پەروەردە رایگەیاند: خوێندنگە حكومییەكان بەشێوەی خوێندنی ئەلیكترۆنی و دیجیتاڵی دەتوانن سوود لەخزمەتگوزارییەكانی پلاتفۆرمی ( ئی-وانە) و پلاتفۆرمی ( قوتابخانەكەم ) وەربگرن و خوێندنگە ناحكومییەكانیش سیستمی وەزارەتی پەروەردە و خوێندنگە ناحكومییە نێودەوڵەتییەكان و بیانییەكان خوێندنی ئۆنلاین بەگوێرەی سیستمی خۆیان بەركار دەكەن.


PUKMEDIA