وەزارەتی پەروەردە رێنماییەكانی خوێندنی ئۆنلاین بڵاودەكاتەوە

PUKMEDIA

لۆگۆى وەزارەتى پەروەردە

وەزارەتی پەروەردە رایدەگەیەنێت: خوێندنگە حكومییەكان بەشێوەی خوێندنی ئەلیكترۆنی و دیجیتاڵی دەتوانن سوود لەخزمەتگوزارییەكانی پلاتفۆرمی ( ئی-وانە) و پلاتفۆرمی ( قوتابخانەكەم ) وەربگرن و خوێندنگە ناحكومییەكانیش سیستمی وەزارەتی پەروەردەو خوێندنگە ناحكومییە نێودەوڵەتییەكان و بیانییەكان خوێندنی ئۆنلاین  بەگوێرەی سیستمی خۆیان بەركار دەكەن.

وەزارەتی پەروەردەی حكومەتی هەرێم رێنماییەكانی خوێندنی ئۆنلاینی بڵاوكردەوەو رایگەیاند: پاش ئەنجامدانی كۆبوونەوەیەكی تایبەت بە پڕۆسەی خوێندن، بڕیاردرا بەڕاگرتنی دەوام لە رۆژی دووشەممە 30 ی 3ی 2026  وە، بە شێوەی ئامادەبوون،  لە ناو هەموو ناوەندەكانی خوێندنی حكومی و ناحكومی ونێودەوڵەتی لە هەرێمی كوردستان ، تا ئەوكاتەی بەڕەسمی ئاگادار دەكرێنەوە پڕۆسەی دەوامكردنی ناو پۆل لە هەموو ناوەندەكانی خوێندن ئەنجامنادرێت. 

راشیگەیاندووە: خوێندنگە حكومییەكان بەشێوەی خوێندنی ئەلیكترۆنی و دیجیتاڵی دەتوانن سوود لەخزمەتگوزارییەكانی پلاتفۆرمی ( ئی-وانە) و پلاتفۆرمی ( قوتابخانەكەم ) وەربگرن، یان سوود لەگروپە ئەلیكترۆنییەكانی قوتابخانەكان وەردەگرن بۆ پێدانی ئەركی ماڵەوە لەلایەن مامۆستایان بەشێوەی رۆژانە وێڕای پەخشكردنی وانەكانی هەموو قۆناغەكانی خوێندن لەهەرسێ (تەلەفزیۆنی پەروەردەیی) هەولێر و سلێمانی و دهۆك كە لەهەموو شارو شارۆچكەكانی كوردستان پەخشیان هەیە.

وەزارەتی پەروەردە ئاماژەی بەوەشكردووە: خوێندنگە ناحكومیەكانی سیستمی وەزارەتی پەروەردە و قوتابخانە ناحكومییە نێودەوڵەتییەكان و بیانییەكان خوێندنی ئۆنلاین  بەگوێرەی سیستمی خۆیان بەركار دەكەن، دڵنیایش دەدەینە ناوەندەكانی خوێندن و قوتابیان لەكاتی گونجاو هەمواركردنەوە و گۆڕانكاریی لە ساڵنامەی خوێندن دەكرێت وكاتی تاقیكردنەوەكان  دیاری دەكرێت  و مافی قوتابیان پارێزراو دەبێت .

بۆ پلاتفۆڕمی ئی وانە كلیك لێرە بكە ...

بۆ پلاتفۆڕمی قوتابخانەكەم وانە كلیك لێرە بكە ...


PUKMEDIA