حکومەتی هەرێم: پشتیوانی تێپەڕاندنی قەیرانەکانین

PUKMEDIA

لۆگۆی حکومەتی هەرێمی کوردستان

وەفدی دانوستانکاری حکومەتی هەرێمی کوردستان رایدەگەیەنێت لیژنەیەکی هاوبەش لە وەزارەتی نەوتی حکومەتی فیدڕاڵیی و وەزارەتی سامانە سروشتییەکانی هەرێم بۆدەستپێکردنی هەناردەکردنی نەوت پێکدەهێنرێت و دووپاتیشی دەکاتەوە، کە پشتیوانن بۆ هەر هەنگاوێک کە ببێتە هۆی زیادکردنی داهاتی گەنجینەی گشتی و چارەسەری قەیرانی دارایی.

وەفدی دانوستانکاری حکومەتی هەرێمی کوردستان، راگەیەندراوێکی لەسەر هەناردەی نەوت بڵاوکردەوە و ئاماژەی بەوەکردووە:ئەمڕۆ، 17ی ئازاری 2026، کۆبوونەوەیەکی هاوبەش لە نێوان حکومەتی فیدڕاڵیی عيراق و حکومەتی هەرێمی کوردستان ئەنجامدرا، تایبەت بە بابەتی هەناردەکردنی نەوت لە کێڵگە نەوتییەکانی کەرکووک و دەستپێکردنەوەی هەناردەی نەوتی هەرێمی کوردستان لە ڕێگەی بۆری گواستنەوەی نەوتی هەرێم بۆ بەندەری جەیهانی تورکیا.

راشیگەیاندووە: وەفدی دانوستانکارى حکومەتی هەرێمی کوردستان، لە چوارچێوەی شەراکەتی دەستووریی و لە سۆنگەی هەستکردن بە بەرپرسیاریەتی نیشتیمانی، جەختی کردەوە لەسەر ئامادەیی تەواوی هەرێمی کوردستان بۆ گرتنەبەری هەر ڕێکار و هەنگاوێک کە ببێتە هۆی زیادکردنی داهاتی گەنجینەی گشتی و چارەسەری قەیرانی دارایی.

پەیوەست بە هەنگاوە کردارییەکانیش بۆ هەناردەی نەوت، وەفدی دانوستانکاری حکومەتی هەرێمی کوردستان ، ئاشکرای کردووە: هەردوو حکومەت ڕێککەوتن لەسەر ئەوەی لیژنەیەکی هاوبەش لە وەزارەتی نەوتی حکومەتی فیدڕاڵیی و وەزارەتی سامانە سروشتییەکانی هەرێم پێکبهێنن، بۆ دەستپێکردنی هەنگاوە تەکنیکیی و کارگێڕییە پێویستەکان، بە مەبەستی دەستپێکردنی هەناردەکردنی نەوت.

ئاماژەی بەوەشکردووە: لە سبەینێوە بۆ بازاڕە جیهانییەکان لە ڕێگەی بۆری هەرێم، لەگەڵ گەڕانەوەی داهاتی فرۆشتنی نەوتی هەناردەکراو بۆ گەنجینەی گشتی فیدڕاڵ.

لە کۆتایشدا، وەفدی دانوستانکاری حکومەتی هەرێمی کوردستان، ئاشکرای کردووە: هەردوو لا ڕێککەوتن لەسەر گرتنەبەری ڕێکارییە ئاسایشییە پێویستەکان بۆ پاراستنی سەلامەتی کێڵگە نەوتییەکان و دڵنیابوون لە بەردەوامی هەناردەکردنی نەوت.

PUKMEDIA