له‌گه‌روی هورمزه‌وه‌ 20 ملیۆن به‌رمیل نه‌وتی رۆژانه‌ بۆ جیهان كه‌مده‌كات

Sky News

گەرووی هورمز

جەنگی ئەمریکا و ئیسرائیل لەگەڵ ئێران نرخی نەوت لە بازاڕەکانی جیهان بەرزدەکاتەوە، پسپۆڕێکی ئابووریش دەڵێت: ئەگەر جەنگەکە درێژە بکێشێت، نرخی نەوت زیاتر بەرزدەبێتەوە.

بەهجەت ئەحمەد شارەزا لە بوارى وزە و نەوت بە PUKMEDIA ی راگەیاند: بەهۆی جەنگی ئەمریکا و ئیسرائیل لەگەڵ ئێران بەشی زۆری گەرووی هورمز داخراوەو ئەمەش کاریگەری کردوەتە سەر کەمکردنەوەی هەناردەکردنی نەوتی کەنداو بۆ جیهان، کە لەئێستادا بەهۆی ئەو جەنگەوە رۆژانە 20 ملیۆن بەرمیل نەوتی رۆژانە لە گەرووی هورمزەوە کەمتر هەناردەی ئەوروپا دەکرێت.

وتیشی: بەهۆی ئەو کێشەیەوە خستنەرووی نەوت لەبازاڕەکانی جیهاندا دابەزیوەو ئەمەش نرخەکەی بەرز کردوەتەوە، هاوکات خواست لەسەر نەوتیش بەدوو شێوە زیادی کردووە، یەکەم،  بەکارهێنەرانی نەوت چاوەڕوانی درێژەکێشانی جەنگەکە دەکەن و بۆ ئەو مەبەستەش هەوڵی پاشەکەوتکردنی نەوت دەدەن، دووەم، زیادبونی خواست بەرامبەر بە خستنەڕوو، هۆکارێکی سەرەکیە بۆ بەرزبونەوەی نرخی نەوت.

راشیگەیاند: لەئەگەری بەردەوامبونی جەنگەکە چاوەڕواندەکرێت نرخی نەوت لەبازاڕەکانی جیهان زۆر زیاتر بەرزببێتەوەو بەشێوەیەک بەرمیلێک نەوت بگاتە 150 دۆلار، ئەمەش کاریگەری لەسەر بەکارهێنەرانی نەوت و غاز و وزە، دەبێت، لەو چوارچێوەیەشدا لە ئێستادا بەشێک لە وڵاتانی ئەوروپا روبەڕووی کەمبونەوەی نەوت و غاز و بەرهەمەکانی دیکەی نەوتی خاو بونەتەوە.

هۆکارە دەرەکییەکان هەمیشە کاریگەری لەسەر نرخی نەوت و بەرهەمەکانی دیکەی نەوتی خاو بەجێدەهێڵن و دابەزین و بەرزبونەوەی بەرچاو بەخۆیەوە دەبینێت، وەک چۆن لەکاتی بڵاوبونەوەی ڤایرۆسی کۆرۆنادا، بەهۆی نەبوونی خواست لەسەر ئەو بەرهەمە نرخی بەرمیلێک نەوت دابەزینێکی بەرچاوی تۆمار کرد، لە ئێستاشدا کاریگەری جەنگ نرخەکەی بە ئاستێکی بەرچاو بەرزکردوەتەوەو ئەمڕۆ نرخی یەک بەرمیل نەوتی پرێنت لە بازاڕدا 97 دۆلار و 85 سەنت بوو، کەبەراورد بە بەیانی ئەمڕۆ دابەزیوە، کە نرخەکەی 100 دۆلار و 55 سەنت بوو.

PUKMEDIA