وەزارەتی رۆشنبیری: میدیاكان بەرپرسیارانە رووماڵبكەن و ئاسایشی نیشتمانی بپارێزن

PUKMEDIA

وەزارەتی رۆشنبیری و لاوان

بەڕێوەبەرایەتی گشتی راگەیاندن و چاپ و بڵاوكردنەوەی وەزارەتی رۆشنبیری داوا لەكەناڵەكانی راگەیاندن دەكات بەشێوەیەكی بەرپرسیارانە رووماڵی رووداوەكان بكەن، بەجۆرێك پاراستنی ئاسایشی نیشتمانی و سەروماڵی هاووڵاتیان ئەولەویەتی یەكەم بێت، دەشڵێت: وەزارەتمان رێكاری یاسایی توند بەرامبەر بەسەرپێچیكارانی یاساو رێنماییەكان دەگرێتەبەر.

لەڕاگەیەندراوێكی بەڕێوەبەرایەتی گشتی راگەیاندن و چاپ و  بڵاوكردنەوەی وەزارەتی رۆشنبیری كەئیمزای شیروان عەوڵا میرزا بەرێوەبەری گشتی لەسەرەو كۆپییەكی بۆ PUKMEDIA نێردراوە راگەیەندراوە: بەداخەوە ناوچەكەمان بەدۆخێكی سەخت و  ئاڵۆزدا تێدەپەڕێت، هەرچەندە هەرێمی كوردستان بەشێك نییە لەو جەنگەو لەداهاتووشدا بەشێك نابێت لێی و بەتەواوەتی سەربەخۆیی و بێلایەنی خۆی دەپارێزێت، بەڵام بەو حاڵەشەوە هەرێمەكەمان لەدۆخێكی نائاسایدایەو پڕیشكی جەنگەكە بەرئێمەش كەوتووە.

راشیگەیاندووە: بۆیە جەخت لەسەر ناوەڕۆكی نووسراومان ژمارە 235 لە 2ی 3ی 2026دەكەینەوە، كە كەناڵەكانی راگەیاندن بەشێوەیەكی بەرپرسیارانە رووماڵی رووداوەكان بكەن، بەجۆرێك پاراستنی ئاسایشی نیشتمانی و سەروماڵی هاووڵاتیان ئەولەویەتی یەكەمی كەناڵەكان بێت، هەروەها لەكاتی روماڵی راستەوخۆی رووداوەكاندا نەبنە هۆی دڵەڕاوكێ بۆ هاووڵاتییان و دووربن لەبڵاوكردنەوەی گواستنەوەی راستەوخۆ یان وێنەی ئاڕاستەكردنی درۆن و موشەك و شوێنی زیانلێكەوتوو.

ئاماژە بەوەشكراوە: لەم كاتەدا ئەو هەڵسوكەوتە لەلایەن هەر دەزگاو رایەڵەیەكی میدیاییەوە بكرێت دوورە لەیاساو لۆژیك و پێچەوانەی ماددەی سێیەم/بڕگەی سێیەمە لە (رێنمایی رێكخستنی فریكوێنسی سپەیس لە هەرێمی كوردستان).

لەكۆتایی راگەیەندراوەكەی بەڕێوەبەرایەتی گشتی راگەیاندن و چاپ و  بڵاوكردنەوەی وەزارەتی رۆشنبیریدا ئەوەش راگەیەندراوە:  وەزارەتمان ئەركی خۆیەتی كەڕێكاری یاسایی توند بەرامبەر بەسەرپێچیكارانی یاساو رێنماییەكان بگرێتەبەر.

PUKMEDIA

دەقی راگەیەندراوەكە: