وەزارەتی دارایی سیستەمێكی نوێی بۆ خانەنشینكردنی فەرمانبەران راگەیاند

PUKMEDIA

وەزارەتی دارایی و ئابوری هەرێم

وەزارەتی دارایی سیستەمێكی نوێی بۆ خانەنشینكردنی فەرمانبەران راگەیاند و پڕۆسەكەی خستەسەر سیستەمی ناوەندیی مووچە، لەمەودوا هەبوونی "كۆدی بێهاوتا (UPN)" مەرجی سەرەكییەو بەبێ ئەو كۆدە هیچ مامەڵەیەكی خانەنشینی ئەنجام نادرێت.

وەزارەتی دارایی و ئابوری هەرێم، گشتاندنی دارایی ژمارە 3 ی ساڵی 2026 تایبەت بەخانەنشینكردنی فەرمانبەران بەسیستەمی ناوەندی مووچە بڵاوكردەوەو رایگەیاند: سەبارەت بە جێبەجێكردنی سیستەمی ناوەندی مووچە (پەیرۆڵ) بۆ خانەنشینانی بواری راژەی شارستانی و پێشمەرگەو هێزەكانی ئاسایشی ناوخۆ، لەئێستادا داتاو زانیاری سەرجەم بەڕێوەبەرایەتییەكانی خانەنشینی لەخۆدەگرێت كە دابەشدەبن بەسەر 12 بەڕێوەبەرایەتی خانەنشینی شارستانی و هێزەكانی ئاسایشی ناوخۆ 2 بەڕێوەبەرایەتی خانەنشینی پێشمەرگە.

راشیگەیاندووە: پڕۆسەكە خراوەتەسەر سیستەمی ناوەندیی مووچەو لەمەودوا هەبوونی "كۆدی بێهاوتا (UPN)" مەرجی سەرەكییەو بەبێ ئەو كۆدە هیچ مامەڵەیەكی خانەنشینی ئەنجام نادرێت.

ئەوەشی خستووەتەڕوو: پێویستە فەرمانگەكان سێ مانگ پێش وادەی یاسایی، دۆسیەی فەرمانبەر بە شێوەی دیجیتاڵی ئاڕاستەی خانەنشینی بكەن، بۆ پلە تایبەتەكان فەرمانی هەرێمی و بۆ مامۆستایانی زانكۆش دواین نازناوی زانستی كراوەتە مەرج بۆ راییكردنی مامەڵەكانیان.

وەزارەتەكە جەختیشی كردووەتەوە: هەر دۆسیەیەك كەموكورتی هەبێت، دەبێت لە ماوەی 72  سەعاتدا لە لایەن فەرمانگەی پەیوەندیدارەوە راست بكرێتەوە.

PUKMEDIA

دەقی گشتاندنەكە: