ئەندروی برای پاشای بەریتانیا دەستگیركرا

ميدياكان

ئەندروی برای پاشای بەریتانیا

پۆلیسی بەریتانیا دەستگیركردنی ئەندرو-ی برای پاشا چارڵزی بەتۆمەتی تێوەگلان لە دۆسیەی جێفری ئێپستین راگەیاند.

لەوبارەیەوەپۆلیسی بەریتانیا رایگەیاند:  ئۆپراسیۆنی دەستگیركردنی ئەندرو لەلایەن پۆلیسی وادی تەمز-ەوە بە هەشت ئۆتۆمبێلی پۆلیس ئەنجامدراوەو دوای ساڵانێك لە تێوەگلانی ناوبراو لە دۆسییە گوماناوییەكانی جێفری ئێپستین-ی بازرگانی پێشووی ئەمریكی.

بەپێی سەرچاوەكانی نزیك لە لێكۆڵینەوەكە، دەستگیركردنەكە پەیوەندی بە گومانی گواستنەوەی زانیاری و بەڵگەنامەی نهێنیی دەوڵەتەوە هەیە بۆ جێفری ئێپستین، لەو سەردەمەی كە ئەندرو وەك نێردەی بازرگانیی بەریتانیا كاری كردووە. لە لایەكی دیكەوە، كیر ستارمر، سەرۆكوەزیرانی بەریتانیا داوای لە ئەندرو و هەموو ئەو كەسانە كردووە كە زانیارییان لەسەر دۆسیەی ئێپستین هەیە، هاوكاریی دەسەڵاتە دادوەرییەكانی بەریتانیا و ئەمریكا بكەن.

ئەم رووداوە دوای ئەوە دێت كە لە مانگی تشرینی یەكەمی رابردوودا، پاشا چارڵزی سێیەم بڕیاری دا هەموو نازناوە شاهانەكان لە ئەندروی برای وەربگرێتەوە و لە كۆشكی "رۆیاڵ لۆدج"یش دەری بكات، ئەمەش وەك هەوڵێك بۆ پاراستنی ناوبانگی خێزانی شاهانە لەو فەزیحە ئەخلاقی و یاساییانەی كە بەرۆكی ئەندرویان گرتووە.

PUKMEDIA