دانیشتنی ئەنجومەنی نوێنەران بۆ هەڵبژاردنی سەرۆککۆمار دواخرا

PUKMEDIA

ئەنجومەنی نوێنەرانی عیراق

هەرچەندە بڕیاربوو سەعات 11ی پێشنیوەڕۆی ئەمڕۆ دانیشتنی ئەنجومەنی نوێنەرانی عیراق تایبەت بە هەڵبژاردنی سەرۆککۆمار ئەنجام بدرێت، بەڵام دانیشتنەکە دواخرا.

نوسینگەی راگەیاندنی هەیبەت حەلبوسی سەرۆکی ئەنجومەنی نوێنەرانی عیراق رایگەیاندووە: یەکێتیی نیشتمانیی کوردستان و پارتی دیموکراتی کوردستان کە هەردووکیان کاندیدیان هەیە بۆ ئەو پۆستە، داواکارییان پێشکەشی سەرۆکایەتی ئەنجومەن کردووە، بەمەبەستی دواخستنی دانیشتنەکەی ئەمڕۆ ئەمەش لەپێناو پێدانی کاتی زیاتر بۆ لێکتێگەیشتن لەنێوان هەردوو حزب.

بەپێی  دەستوور رۆژی یەکشەممە 1ی2ی2026 دوا وادەیە بۆ هەڵبژاردنی سەرۆککۆمار لەلایەن ئەنجومەنی نوێنەرانی عیراقەوە.

یەکێتیی نیشتمانیی کوردستان بەگوێرەی رێککەوتن و نەریتە سیاسییەکان ئەو پۆستە وەک رابردوو بە ئیستحقاقی خۆی دەزانێت و بۆ ئەمەش نزار ئامێدی وەک تاکە کاندیدی رەسمیی خۆی بۆ وەرگرتنی پۆستی سەرۆککۆمار پێشکەش بە ئەنجومەنی نوێنەران کردووە.

لەدوای رووخانی رژێمی پێشووی عیراقەوە، بەگوێرەی رێککەوتن و نەریتە سیاسییەکان ئەو پۆستە وەک پشکی یەکێتیی نیشتمانیی کوردستان دیاریکراوە و لەڕابردووشدا رەوانشاد سەرۆک مام جەلال و د.فواد مەعسوم و د.بەرهەم ئەحمەد ساڵح و د.لەتیف رەشید لەسەر پشکی یەکێتی ئەو پۆستەیان وەرگرتووە، بۆ ئەم خولەش یەکێتیی نیشتمانیی کوردستان نزار ئامێدی وەک تاکە کاندید بۆ ئەو پۆستە دیاریکردووە.

PUKMEDIA