شێخ جەعفەر جەخت لەبەردەوامیی پەیوەندییەكانی نێوان ئەمریكاو هەرێم دەكاتەوە

راگەیاندنی جێگری سەرۆكی هەرێم

سەردانی جێگری سەرۆكی هەرێم بۆ ئەمریكا

شێخ جەعفەر شێخ مستەفا، جێگری سەرۆكی هەرێمی كوردستان، كە بەبانگهێشتنامەیەكی رەسمی لە ئەمریكا بوو چەند دیدار و كۆبوونەوەیەكی لەگەڵ ژمارەیەك لە سیناتۆر و ئەندامانی ئەنجومەنی نوێنەران لە كۆنگرێسی ویلایەتە یەكگرتووەكانی ئەمریكا كە لەهەردوو پارتی كۆماریی و دیموكراتەكان پێكهاتبوو، هەروەها چەند كەسایەتییەكی سیاسی و شرۆڤەكار و شارەزا لە كاروبارەكانی ڕۆژهەڵاتی ناوەڕاست، ئەنجامدا.

جێگری سەرۆكی هەرێم لە دیدار و كۆبوونەوەكانیدا لە واشنتۆن، سوپاس و پێزانینی زۆری هەرێمی كوردستانی بۆ هاریكاریی و پشتگیریی بەردەوامی ئەمریكا لە عیراق و هەرێمی كوردستان دەربڕی، هەروەها سوپاسی تایبەتی كۆنگرێسی ئەمریكای كرد، سەبارەت بە پاڵپشتییەكانیان لە پڕۆسەی چاكسازیی وەزارەتی پێشمەرگە و دروستبوونی هێزێكی نیشتمانی لەپێناو سەقامگیریی و پاراستنی قەوارەی هەرێمی كوردستان و جەختیشی لە پەرەپێدان و بەردەوامیی پەیوەندییەكانی نێوان ئەمریكا و هەرێمی كوردستان لەسەر بنەمای بەرژەوەندیی هاوبەش كردەوە. 

هەر لە دیدار و كۆبوونەوەكانیدا لەگەڵ لێپرسراوانی ئەمریكا، باس لە دوایین بارودۆخی عیراق و ناوچەكە، لەگەڵ هەڕەشە و مەترسییەكانی داعش و چۆنییەتی روبەڕوبوونەوەی تیرۆر كرا، هەروەها رووداو و پەرەسەندنە هەرێمییەكان و كاریگەرییەكانی لە سەر عیراق و رۆڵی هەرێمی كوردستان لە بەهێزكردنی ئارامیی و ئاسایشی ناوچەكە، بەشێكی تری نێو كۆبوونەوە و گفتووگۆكانیان بوو.

لە میانەی سەردانەكەی جێگری سەرۆكی هەرێم بۆ ئەمریكا، كۆنگرێسمانان و بەرپرسانی سیاسیی و شرۆڤەكارانی بواری سیاسی و ئەمنی ئەمریكا وێڕای دەربڕینی خۆشحاڵیان بە سەردانەكەی بەڕێزیان، رێز و پێزانینی زۆریشیان بۆ هەرێمی كوردستان و ئازایەتی و قارەمانێتیی و قوربانیدانی پێشمەرگە دەربڕی، هەروەها جەختیشیان لە گرنگیی پاراستنی ئاسایش و سەقامگیریی هەرێمی كوردستان كردەوە.

PUKMEDIA