شۆڕش ئیسماعیل: هاوپەیمانان رۆڵیان هەبێت لەئاسایی كردنەوەی دۆخی سوریا

راگەیاندنی وەزیری پێشمەرگە

پێشوازی وەزیری پێشمەرگە لە فەرماندەی هێزەكانی هاوپەیمانان لە هەرێم

شۆڕش ئیسماعیل، وەزیری پێشمەرگەی حكومەتی هەرێمی كوردستان، پێشوازی لە كۆڵۆنێڵ فیتز گیراڵد، فەرماندەی هێزەكانی هاوپەیمانان لە هەرێمی كوردستان (بەوەكالەت) كردو پرسی ئێستای ناوچەكە، دۆخی ئاڵۆزی رۆژئاڤای كوردستان و گرژییەكانی سوریایان تاوتوێكرد.

لەدیدارەكەدا شۆڕش ئیسماعیل، وەزیری پێشمەرگە، نیگەرانی قوڵی خۆی گەیاندە هێزەكانی هاوپەیمانان لەئەنجامی ئەو پەلامارو هێرشانەی سوپای سوریا بۆ سەر كوردانی رۆژئاڤا كە روودەدات، راشیگەیاند: هێزەكانی هاوپەیمانان پێویستە رۆڵی گرنگی خۆیان بگێڕن بۆ ئاسایی كردنەوەی دۆخی نالەباری سوریا، هەوڵبدرێت لە رێگەی لێكتێگەیشتن و گفتوگۆ چارەسەری گرفتەكان بكرێت‌.

هەر لەدیدارەكەدا، پەیوەست بەپڕۆسەی چاكسازی و دامەزراندنی هەردوو دەڤەری سەركردایەتی و دەسەڵاتەكانیان و كۆمەڵێك پرسی تایبەتمەند بەهێزی پێشمەرگە، گفتوگۆیانكرد.

هاوكات كۆڵۆنێڵ گیراڵد رایگەیاند: هێزەكانی هاوپەیمانان چاودێری رووداوەكان دەكەن، لەڕێگەی كەناڵە جیاوازەكانی خۆیان هەوڵی ئاسایكردنەوەی گرژییەكانی دۆخی سوریا دەدەن‌.

PUKMEDIA