هەسەدە هۆشداری دەدات

ئاژانسەکان

هێزەکانی سووریای دیموکرات

هەسەدە لە هێرشەکانی حکومەتی سوریا بۆ سەر ئەو زیندانانەی دەستبەسەرکراوی داعشیان تێدایە هۆشداری دەدات و بۆ رای گشتی رادەگەیەنێت، کە ئاستی هەڕەشەکان بە شێوەیەکی بەرچاو رووی لە زیادبوونە.

ناوەندی راگەیاندنی هێزەکانی سووریای دیموکرات (هەسەدە) لە راگەیێندراوێکدا رایگەیاند: سەرەڕای رێککەوتنی راگەیەندراوی ئاگربەست و ئەو بەیاننامانەی لەو بارەیەوە دەرچوون، گرووپەکانی سەر بە حکومەتی دیمەشق بەردەوامن لە هێرشەکانیان بۆ سەر هێزەکانمان لە عەین عیسا، شەدادێ و رەققە.

ئاماژەی بەوەش داوە: پێکدادانی تووند لە نێوان هێزەکانمان و ئەو گرووپانە لە دەوروبەری زیندانی "ئەقەتان" لە رەقە بەڕێوەدەچێت، کە دەستبەسەرکراوانی رێکخراوی تیرۆریستی داعشی تێدایە، ئەمەش پەرەسەندنێکی ئێجگار مەترسیدارەو ئێمە بۆ رای گشتی دووپاتی دەکەینەوە کە ئاستی هەڕەشەکان بە شێوەیەکی بەرچاو رووی لە زیادبوونە، لەبەر رۆشنایی هەوڵەکانی ئەو گرووپانە بۆ گەیشتن بە زیندانەکە و کۆنترۆڵکردنی و ئەو لێکەوتە ئەمنییە مەترسیدارانەی کە رەنگە لێی بکەوێتەوە و ببێتە هەڕەشە بۆ سەر سەقامگیری و رێگا بۆ گەڕانەوەی پشێوی و تیرۆر خۆش بکات.

PUKMEDIA